Tining makalingkod sa Kamara - Davide

CEBU, Philippines - Giklaro ni kanhi Konsehal Hilario Davide Jr. nga kandidato sa pagka-gobernador sa lalawigan sa Sugbo ubos sa Liberal Party nga walay babag sa paglingkod ni kanhi Mayor Celestino “Tining” Martinez III sa Bogo pagka-kongresista sa ika-upat nga distrito.

Kini tungod kay klaro kaayo sa desisyon sa Korte Suprema nga nagtumbok nga ang hukom "immediately executory."

Matud pa ni Davide sa DyRF nga wala siya’y nakitang ‘legal impedement’ sa paglingkod ni Martinez bisan pa man og nakaduso na og motion for reconsideration si Kongresista Benhur Salimbangon.

Gipasabut ni Davide nga dili babag ang motion for reconsideration “di man mahulog nga injunction o temporary restraining order ang motion for reconsideration ni Salimbangon.”

Apan ang abogado ni Salimbangon nga si Atty. Ramon Richel Delon Urot mipasabot nga ang “immediately executory” nga desisyon sa Korte Suprema wala nagpasabot nga "final and executory."

Matud pa ni Urot nga bisan pa gani og final and executory ang maong desisyon magkinahanglan pa kini og igong adlaw aron makakuha og writ of execution una pa hingpit nga makalingkod si Martinez.

Si Salimbangon miingon sa miaging press conference nga wala na say igong panahon paglingkod si Tining Martinez tungod kay siyam na lamang ka adlaw ang session sa Ubos Balay Balaoranan sa dili pa hingpit nga mo-adjourn alang sa umaabot nga presidential election sa bulan sa Mayo ning tuiga. - Chester Abadilla (BANAT NEWS)