CEBU, Philippines - Wala mobasol ang presidente sa pederasyon sa senior citizen sa dakbayan sa Mandaue ngadto sa mga lokal opisyal sa dakbayan kabahin sa kapakyas sa pagpatuman sa balaod nga alang sa mga senior citizen ug disable dinhi sa nasud.
Kini maoy giklaro ni Benjamin Gai, ang presidente sa pederasyon sa mga senior citizens sa dakbayan sa Mandaue sukwahi sa nahaunang migawas nga balitang migawas nga iyang gibasol ang mga lokal nga opisyal sa dakbayan sa Mandaue.
Si Gahi miingon ang dakbayan nakapatuman niini apan ang nasudnong kagamhanan maoy napakyas ilabi na sa mga ahensiyang gitahasan.
Ang gitumbok ni Gahi mao ang Deparment of Health (DOH) nga maoy gitahasan sa pagsuta kun ang 20 porsiyentong diskuwento alang sa pagpalit og tambal sa mga botika kun napatuman ba gyud. Matud pa niini nga daghang mga botika pa ang wala mosunod niini.
Lakip sa gibasol ni Gahi mao ang Land Transportation Franchising and Regulatory Board (LTFRB) nga gitahasan sa kagamhanan sa pagsuta kun gituman ba sa mga drayber ang 20 porsiyentong diskuwento sa ilang pletihan.
Daghang mga senior citizens ang mireklamong wala makatagamtam sa diskwentong angayan unta nilang madawat gikan sa mga pasaheroan. (BANATNEWS)