Pagpang hatag bisan unsa sa mga politiko atol sa parada did-an

CEBU, Philippines - Gihangyo sa kapolisan ang mga political candidates sa paglikay sa pagpanghatag og mga bisag unsa atol sa parada sa Sinulog Grand Mardi Gras nga mao unya’y mamahimong hinungdan sa disgrasya sa katawhan.

Matud sa Police Regional Director Chief Supt. Lani-O Nerez nga ilang gihangyo ang mga political candidates sa pagkoordinar kanila pinaagi sa paglikay sa pagpangampanya atol sa grand parade karong umaabot January 17.

“We should not make Sinulog festivity as a political activity, dili lang unta nato sagulan og pamolitika nga mga aktibidades,” pasabot pa ni Nerez.

Dugang pa ni Nerez nga kun aduna man gani sila’y makit-ang manghatag o mag-distribute og mga leaflets ila kining badlungon.

Samtang mipahimangno usab si Nerez sa katawhan kabahin sa paggamit og mga pabuto pagpalupad og mga balloons sa kadalanan nga posibleng makasangit sa mga wirings sa poste nga magmugna og kadaot niini, angay usab nga likayan ang pagpalupad og mga helicopters ug abyon nga ubos kaayo.

Gihangyo usab ni Nerez ang katawhan nga dili unta magpasagad og pangihi sa bisan asang lugar tungod kay aduna man sila’y i-provide nga mga pansayan nga mao unyay gamiton nila.

Sa laing bahin, gihulagway ni Nerez nga lahi ang preparasyong iyang giandam sa milabay’ng Sinulog ug eleksyon tungod kay mas estrikto sila karun.

Gihulagway usab sa tigpamaba sa Central Command nga si Major Wilson Feria nga aron malikayan ang mga posibleng mahitabo ila nang gibutangan og mga tawo sa ilang gitawag nga ‘strategic areas’ atol sa prosesyon ug grand parade.

Matud pa ni Feria nga kini ilang gibuhat tungod kay uban nga mipahigayon sa security measures atol sa grand parade ug prosesyon mga estudyante sa Civic Welfare and Training Services nga di makalahutay og bantay hangtod gabii. - Lesley Caminade (BANAT NEWS)