CEBU, Philippines - Tukion na karong sunod semana ang gidusong petisyon alang sa usbaw sa suholan sa mga mamumuo dinhi sa rehiyon siyete atol sa unang tigom karong petsa 14 tali sa kadagkuan sa Regional Tripartite Wages and Productivity Board (RTWPB)-7.
Si Labor Representative Marianito Ventura nagkanayon nga nakompleto na ang tanang requirements alang sa gidusong petisyon alang sa usbaw sa suholan sa mga mamumuo sa Alliance for Progressive Labor (APL) niadtong nakalabay'ng Disyembre sa miaging tuig.
Sa nasayran giuli sa board niadtong miaging tuig ang maong petisyon tungod sa teknikalidad apan gibalik ra usab pagduso sa wala pay Pasko sanglit nakompleto naman ang mga gikinahanglan niini.
Ang APL ug ang Cebu Labor Coalition miduso og petisyon alang sa usbaw nga P128 nga daily wage- increase sa mga mamumuo dinhi sa rehiyon. Mipasabot si Ventura nga makompleto na gani ang gikinahanglan ila kining ipublikar aron usab pagpahigayon nila dayon og public hearing alang sa maong katuyoan.
Sa pagkakaron ang P267 lang ang minimum wage sa Central Visayas sa non-agriculture sector sa class A; P246 sa class B; 237 sa class C; ug P222 sa class D.
Alang sa agricultural sector (non-sugar sector), ang minimum wage niini P249, P232, P217 ug P202 depende sa asa nga bahin sa rehiyon samtang sa sugar sector, ang minimum wage P217 ug sugar mills sector ang minimum wage P237 sa tanang classes.
Ang Class A mao ang Carcar, Cebu, Danao, Mandaue, Naga ug Talisay, ingon man ang Compostela, Consolacion, Cordova, Liloan, Minglanilla, ug San Fernando tungod kay sila sakop sa gitawag nga expanded Metro Cebu.
Ang Class B mao ang Toledo City, Bogo, ug ang tanang kalungsoran sa Sugbu gawas lang sa Bantayan Island ug Camotes, samtang ang Class C naglangkob sa Bohol ug Negros Oriental, ang Class D mao ang nasakop sa Siquijor ug mga munisipyo sa Bantayan ug Camotes. BANATNEWS)