Ulo Nagkawil-Kawil

CEBU, Philippines - Nagkawil-kawil na ang ulo sa usa ka negosyante og kahoy dihang naabtan sa mga mirespondeng mga polis human kini tigbasa sa mamaligya-ay og kahoy usab pasado alas kuwatro sa hapon sa miaging adlaw sa barangay Caurasan lungsod sa Carmen.

Ang namatay nailhan nga si Rogelio Peña, 34, residente sa nahisgutang barangay ug negosyante og kahoy samtang ang suspetsado giilang si Joy Nuñez nga kasamtangang nagpuyo sa barangay Sotes sa samang lungsod ug lumad nga taga barangay Bajo, Buenavista, Bohol.

Sa pakighinabi sa Banat News kang SPO1 Joselito Jopia nga maoy nag-imbestigar sa kaso mibutyag kini nga ang biktima ug ang suspetsado nag-abot sa maong lugar ug ang suspetsado gikatahong nanghagad sa biktima nga aduna siya'y ibaligyang kahoy.

Hinungdan nga giingnan kini sa biktima nga ipadala kini diha sa sentro aron siya mabayran apan ang suspetsado nagdumili kini tungod kay gusto sa suspetsado adto lang sila sa ilang panimalay magbinayranay.

Apan tungod sa pagdumili sa biktima adunay gamay'ng tinubagay nga nahitabo tali kanila ug human sa ilang tinubagay miuli ang suspek sa ilang balay ug giingong miinom og usa ka galong tuba.

Dangta'g pipila ka gutlo gikatahong nahiagi ang biktima diha sa tugkaran sa suspek ug gikomprontase kini sa naulahi hinungdan nga nahitabo na usab ang tinubagay bahin lang gihapon sa kahoy nga unta paliton sa biktima.

Taliwala sa tinubagay sa duruha kalit lang miibot sa gisukbit nga sundang ang suspetsado nga may gitas-ong kapin 19 pulgadas ug gihapsan ang ubol-ubol sa biktima hinungdan sa hinanali niining kamatayon.

Matud pang SPO2 Jopia, panit nalang maoy naggunit sa ulo sa biktima ug nagkawil nalang kini dihang ilang naabtan.

Ang suspek dali usab nga mitahan sa iyang kaugalingon ngadto sa kapolisan pinaagi ni SPO1 Gil Jabonero kinsa mao nay midala kaniya sa police station sa nahisgutang lungsod.

Karung adlawa gikatakdang pasakaan og kasong murder ang suspetsado nga kasamtangan nga nagtingkagol sa Carmen Police Station.

Direktor sa PCAS-7 mo-imbestigar bahin sa dinakpang Norwegian

Ni Guam Logrono

Norwegian nga nakuhaag armas samtang paingon mosakay’g eroplano diha sa tugpahanan sa Mactan Cebu International Airport Authority (MCIAA) niadtong Disyembre 27 sa miaging tuig gialegar nga gibuhian sa mga sakop sa Police Center for Aviation Security (PCAS) bugti sa dakong kantidad sa kwarta.

Nunot niini, ang hepe sa PCAS-7 nga si Sr. Supt. Joselito Salido mibutyag nga dunay himuong imbestigasyon sa iyang mga sakop kabahin sa maong alegasyon.

Una niini, usa ka sinaligang tinubdan mibutyag sa DySS nga giingong gibuhian sa mga sakop sa airport police ang Norwegian nga si Anders Ovenstad, 68, human nakuhaan sa iyang bagahe og .38 kalibreng armas samtang mosakay na unta sa Cathay Pacific padulong sa Hongkong una molahos sa ilang nasud. Si Ovenstad uban sa iyang asawa’g anak kinsa nagpuyo sa BF Homes barangay Basak dakbayan sa Lapulapu wala pasakya sa mga sakop sa PCAS human makit-i sa x-ray machine sa airport nga dunay armas sa bagahe niini.

Apan gikatahong gibuhian sa mga sakop sa airport police human matud pa dunay ‘negosasyon’ nga nahitabo nga naglambigit og dakong kantidad.

Si Sr. Supt. Salido, nga gikahinabi sa DySS mikumpirmar nga nadakpan sa iyang mga sakop si Ovenstad ug nakuhaa’g usa ka .38 nga revolver nga wala'y tambor nga tayaon nga may tatak nga ‘US. Made’ apan nasutang wala'y dokumento ug usa kini ka paltik.

 Matud pa niini nga human makit-i sa x-ray machine giablihan kini sa iyang mga sakop ug gisikop ang maong langyaw kinsa giingong nag-wheelchair niadtong higayuna ug gidala sa opisina sa PCAS.

Giingong sa pag-imbestigar ni PO2 William Velvestre mitug-an si Ovenstad nga iyang gi-souvenir ang maong armas nga napalit niini dinhi sa Sugbu ug dad-on unta niya didto sa Norway.

Sa programang Kapulisan ug ang Katawhan sa DySS, si Sr. Supt. Salido mibutyag nga bisan paman og piyesa lang sa armas ila gihapon kining sikupon, bisan pa og kini souvenir lang.

Sumala pa niya nga gipasakaan gyud nila ni PO2 Velvestre ug PO2 Ian Catillo og kasong illegal possession of firearm si Ovenstad ug na-inquest kini ni 1st Assistant City Prosecutors Jesus Rodrigo Tagaan sa dakbayan sa Lapulapu ug nakapiyansa hinungdan nga mimando siya nila ni PO2 Velvestre ug PO2 Castillo nga i-turnover si Ovenstad sa iyang abogado nga si Atty. William Manos.

Bisan paman nakabiya sa nasud si Ovenstad, mipasalig kining mobalik aron atubangon ang kaso. – BANAT NEWS