CEBU, Philippines - Patay ang usa ka 14-anyos nga bata human gi-shotgun sa ulo sa gwardiya tungod sa pagdudang mangawat kini og scrap metals sa compound sa gibantayang shipyard kun baraderohan diha sa barangay Tayud lungsod sa Consolacion niadtong Huwebes sa alas 7:30 sa buntag.
Ang biktima nga namatay diha-diha human maigo sa ulo mao si Marikim Solicar Alao, taga sitio Bangkerohan sa barangay Tayud, Consolacion.
Samtang ang suspek mao si Rodrigo Dalagan Alog, gwardiya sa Colorado Shipyard nga nahimutang sa maong lugar ug konektado sa Alywin Security Agency and Detective Management Corporation.
Sumala pa ni SPO2 Nelson Ducay ang Chief Investigator sa Consolacion Police Station dihang nakahinabi sa Banat News nga ang biktima luwan sa usa ka sakayan ug duha ka batang sila si Gerome Arita ug Ralph Bomento padulong na untang modunggo sa baybayon sa maong shipyard.
Giingong dunay mipitik (tirador) sa mga bata samtang padulong modahik sa sakayan diha sa baybayon maong mibalik sila og bugsay palawod apan giingong kalit nga nadungog ang buto sa armas ug diha-diha natagak si Alao sa dagat.
Nasuta nga ang biktima naigo diha sa luyong bahin sa ulo ug human mabatyagi sa mga kauban nga natagak ilaha kining gitabangan og aswat balik sa sakayan ug daling mibugsay padaplin.
Ang bata gidala sa Vicente Sotto Memorial Medical Center apan gideklarar nga dead on arrival, ang suspek malinawong mitahan sa iyang kaugalingon sa mga mirespondeng kapolisan.
Ang suspek maoy kasamtangang nagbantay sa maong baraderohan ug giingong nagdudang nangawat ang mga bata og puthaw, giingong gisuwayan niya kini og badlong apan wala mopatuo hinungdan nga iyaha kining gipusil.
Ang suspek gipasakaan na kagahapon og kasong murder diha sa piskalya sa probinsya. - Uban sa report ni Bryner L. Diaz (BANAT NEWS)