CEBU, Philippines - Mokabat sa P25 milyones ang danyos sa sunog nga miugdaw sa usa ka hardware didto sa dalan Hernan Cortes, Brgy. Subangdako, dakbayan sa Mandaue sa milabay’ng gabii.
Ang nasunog mao ang COM Hardware Inc. nga gipanag-iya ni Ben Ching nga nag-abang sa edipisyo nga gipanag-iya ni Espilita Vidal.
Base sa imbestigasyon ni FO3 Cepriano Codilla sa kabomberohan sa Mandaue, nasayran gikan kang Rodrigo Villareal ang security guard sa maong establisamento nga didto magsugod ang kayo sa tunga nga bahin sa bodega sa maong tindahan.
Gumikan sa kadaghang truso ug mga baligyang pintal sa maong bodega dali kaayong mikatap ang kayo ngadto sa uban pang bahin sa maong bodega hangtod nga napagan ang tindahan.
Si FO3 Codilla nagkanayon nga padayon pa ang ilang imbestigasyon aron sa pagsuta sa pag-ulbo sa kayo nga miugdaw sa maong hardware.
Nadawat sa kabomberohan sa Mandaue ang alarma sa alas 8:22 sa milabay’ng gabii ug nakontrolar kini sulod sa 30 minutos.
Hinuon wala na kini makalabang ngadto sa mga kasikbit nga mga edipisyo sa maong hardware apan milanat pa og siyam ka takna una hingpit nga napawong ang kayo.
Hinuon walay mga kinabuhing naangol atol sa maong sunog. – BANAT NEWS