Dinasmagay sa motor 1 patay, 1 angol

CEBU, Philippines -  Namatay ang usa ka 66 anyos nga lolo samtang naangol usab ang laing 16 anyos nga bayong-bayong atol sa panagbangga sa duha ka motorsiklo didto sa barangay Lamacan ,lungsod sa Sibonga, niadtong Martes sa hapon.

Ang namatay mao si Anecito Ulan-ulan, 66, minyo, nga taga barangay Sabang, Sibonga samtang ang angol mao usab si Remark Sosada, 16, nga taga barangay Manatad, sa mao gihapong lungsod, usa ka estudyante sa 4th year high school sa Sibonga National High School.

Si PO2 Ederlino Bacusmo sa Sibonga Police Station mibutyag sa Banat News nga sa wala pa ang hitabo, nagginukdanay ang duha ka motorsiklo, ug nauna si Ulan-ulan paingon sa barangay Lamacan samtang nagsunod usab si Sosada nga mao pay paggawas gikan sa eskuwelahan ug paingon nang mopauli.

Apan sa paghiabot nila sa Lamacan, kalit lang miliko sa walang bahin si Ulan-ulan nga wala hibantaye ni Sosada hinungdan nga nadasmagan ang nahauna ug pulos sila nangatumba ug nasalibay sa karsada.

Daling gihatod ang duha ngadto sa Deiparine Medical Center sa maong lungsod apan gibalhin ngadto sa dakbayan sa Sugbo si Ulan-ulan tungod sa katalandugon sa iyang kahimtang apan gideklarar kining namatay na sa wala pa mahiabot sa tambalanan.

Samtang si Sosada nakagawas dayon sa hospital human madapati og tambal ug kasamtangang gitanggong sa kapolisan sa Sibonga.  – BANAT NEWS