Sinulog 2010: 32 contingents mosalmot sa Sinulog sa Kabataan

CEBU, Philippines - Mga kalihukan sa Sinulog 2010 partikular na ang paglusad niini ingon man ang matag gabii nga kalihukan plantsado na human sa pakigtigom ni Sinulog executive director Ricky Ballesteros kagahapon sa mga komitibang molihok niini lakip na ang Sinulog sa Kabataan nga salmotan sa 15 ka mga contingents gikan sa kalungsoran ug 17 usab sa dakbayan.

Sumala pa ni Ballesteros nga karong Biyernes pormal nang ilusad ang Sinulog 2010 pinaagi sa usa ka Santos nga Misa nga sundan sa launching parade.

Ang Sinulog sa Kabataan sa Lalawigan ipahigayon karong Sabado diin 15 ka mga contingents ang magtigi, walo sa high school ug pito sa elementary division.

Samtang ang Sinulog sa Kabataan sa Dakbayan mosunod usab karong Domingo diin 17 ka mga contingents ang mag-indigay, siyam sa high school ug walo sa elementary.

Ang kampeyon sa matag division makadawat og P150 mil, P100,000 sa 2nd prize, P75 mil sa ikatulong dapit, P50 mil sa ikaupat ug P25 mil sa 5th prize winner.

Nahimong kampeyon sa Sinulog sa Kabataan sa Lalawigan niadtong miaging tuig mao ang Pajo Elementary School ug Carcar Central National High School.

Samtang ang Lahug Elementary School ug Don Sergio Osmeña Sr. Memorial National High School usab sa Sinulog sa Kabataan sa Dakbayan.                    

Ang napulo nga labing nindot nga contingents sa elementary ug napulo usab sa high school division, automatic nga makasalmot sa Sinulog 2010 unya sa Enero 17.

Matud ni Ballesteros nga nagpadayon pa gihapon ang ilang pagpanawat og mga entries ilabi na sa mga out-of-town contingents.

Apan gitataw sa director nga mahibaw-an lang ang gidaghanon sa mosalmot nga mga contingents unya na sa deadline karong Enero 11.

Una na hinuong gibutyag ni Ballesteros nga ubay-ubay ang mipadayag nga mosalmot sa Sinulog 2010 nga naglakip sa gitawag og mga first timers nga mosalmot sa festival.   (Elly Bolonos)   (BANATNEWS)