Mga kiriwan nagpalihi'g lungkab

CEBU, Philippines - Gisubhan sa mga kiriwan og kamot sa dakbayan sa Talisay ang bag-ong tuig pinaagi sa pagpanglungkab sa duha ka mga pinuy-anan sa managlahing barangay sa maong dakbayan ug nakasakiyo gyud og mga salapi ug alahas.

Ang mga biktima mao si Dennis Deanieles, 35, taga Camella Homes, sa barangay Lawaan II, ug Maricor Mangyaw Rio, 37, nga taga Greenfield Village, barangay San Roque pulos sa Talisay.

Sumala sa record sa kapolisan sa maong dakbayan, nasayran nga si Deanieles nawad-an sa iyang P10,000 nga cash, Casio wrest watch nga nagkantidad og P4 mil, Samsung nga cellular phone, nagkantidad og P4,500 ug Sony Ericson nga cellular phone nga nagkantidad og P12 mil.

Base sa imbestigasyon sa mga polis nga si Deanieles gikan pang mibakasyon ug pag-abot niya sa ilang balay niadtong Enero 1, sa alas 3 sa hapon, nakurat nalang siya dihang naabli na ang screen sa bintana niini, ug sa pagsusi niya sa iyang lawak, wala na ang nahisgutang mga butang ug salapi.

 Samtang si Mangyaw nawad-an usab og mga alahas sama sa kuwentas nga gold, tulo ka set nga sing-sing nga gold, tulo ka white gold bracelet, usa ka set nga south sea earring gold, ug usa ka set nga gold earring nga dunay mga batong diamond, apan wala mapiho ang kantidad sa maong mga alahas.

Sa imbestigasyon sa kapolisan nasayran nga ang biktima kauban sa iyang pamilya nanuroy atol sa paghagtok sa alas 12 sa tungang gabii dayong sugat sa bag-ong tuig 2010, walay nahibilin sa ilang balay, busa nakahigayon sa pagpanglungkab ang wala hiilhing kiriwan.

Busa sa pag-uli sa biktima kauban ang iyang mga ginikanan, mao nalay nakita nila nga   na-ukab na ang screen sa bintana sa luyong bahin sa ilang balay ug nawagtang na ang mga nahisgutang mga butang.

Wala'y nahimo ang biktima gawas sa pagtibi nalang gumikan sa kaguol.

Apan dili lang kay mga kawatan sa Talisay ang nagpalihi og pangawat niadtong bag-ong tuig, kay didto sa Santander may usa usab ka negosyante og hayop kinsa gikawatan usab og cash nga bali og P30 mil, ug mga alahas nga nagkantindad ang tanan og P20 mil.

Ang biktima mao si Napoleon Minyao, 52, nga taga barangay Pasil sa nahisgutang lungsod.

Si PO1 Noel Estender, duty desk officer sa Santander Police Station mibutyag sa Banat News nga ang kawatan didto agi sa likod nga bahin sa balay ni Minyao ug nakasulod kini sa balay pinaagi sa pagligwat sa door knob sa sira sa pultahan.

Pagsulod sa kawatan sa kwarto ni Minyao ug sa iyang asawa gipupho dayon niini ang salapi ug mga alahas nga hiniposan sa magtiayon kinsa wala matulog niadtong higayona sa ilang lawak . – BANAT NEWS