Heightened alert ang mga pwerto

CEBU, Philippines - Gipaubos sa heightened alert ang Philippine Coast Guard – Cebu nunot sa subling pagdagsang na usab sa mga pasahero sa nagkalainlaing pantalan dinhi sa Sugbu gumikan sa nagsingabot nga pagsugat sa Bag-ong Tuig.

Si Anellito Cabisan, commander sa Coast Guard Central and Eastern Visayas nagkanayon nga ila karong gipatuman ang “no ticket, no boarding policy” sa mga pasaherong mosakay sa barko nga mamauli sa ilang tagsa-tagsa ka mga probinsya.

Gitataw ni Cabisan aron lamang ilang masigurong walay mga barko dinhi sa Sugbu nga nagbiyahean paingon sa nagkalain-laing dapit sa Kabisay-an ug Mindanao ingon man didto sa Manila ang mag-overloading.

Napanglantawan ni Cabisan nga subling modagsa na usab ang mga pasahero sugod karong adlawa sa lain-laing pantalan nga gustong mamauli sa ilang tagsa-tagsa ka probinsya aron adto nila saulogon sa ilang lugar ang pagsugat sa Bag-ong Tuig.

Gawas pa niini, giklaro usab niya nga walay lugak-lugak ang pagpatuman sa hugot nga seguridad sulod sa pantalan pagsusi sa mga bagahi nga dad-on sa mga pasahero paingon molukat og tiket sa barko.

Matud niya nagbutang usab sila og mga K-9 team nga maoy moabag kanila. Ang K-9 dogs gi-train og tuyo aron maoy mosimhot sa mga bagahi pag-ila niadtong mga butang nga ilegal nga buot ipalusot sulod sa pantalan aron madala sa ilang tagsa-tagsa ka probinsya.

Samtang midugang siya nga duna gihapoy ilang gipamutang nga “help desk” diha sa mga pantalan aron adunay kaduolan ang mga pasahero sa higayon nga duna kini masugatang problema sulod sa pantalan ug matabangan dayon kini nila.

Ang “help desk” gilangkoban kini sa Coast Guard ug mga empleyado sa mga barko.

Matud ni Cabisan nga hangtod luwas sa Bag-ong Tuig hugot gihapon ilang ipatumang seguridad sulod sa pantalan sanglit daghan na usab ang mamalik dinhi sa Sugbu. -  BANAT NEWS