Norwegian nag-scuba 'lumos

CEBU, Philippines - Nalumos patay ang usa ka Norwegian national samtang nag-scuba diving kauban sa laing tulo pa ka mga langyaw sa Malapascua Island sa lungsod sa Daanbantayan niadtong Huwebes sa alas 11:30 sa buntag.

Ang patay nang nakit-an nga naglutaw sa dagat mao si Aksel Isaksen, Norwegian national ug temporaryong nag-abang og cottage sa Dutch- Philippine Dive Shop and Beach Resort sa maong lugar.

Subay sa imbestigasyon sa kapulisan, Si Isaksen kauban sa ilang langyaw’ng dive instructor nga si Tim Latimer, usa ka Canadian national ug laing duha ka kaubang langyaw niadtong tungura nga naila lang sa pangalang Xavier ug Nicola.

Subay sa gihimong pagsukit sukit sa kapulisan sa duha ka tripolante sa pumpboat nga giabangan sa mga langyaw nga sila si Marcelino Rosales ug Melchor Alejandre gikatahong sila si Xavier ug Nicola maoy nakamatikod nga sa ilang pagtunga gikan sa ilawom wala nay panimuot si Isaksen.

Tungod niini, dali nila kining gitabang ug gikarga sa pumpboat ug gipaginhawa gamit ang oxygen apan wala mobalik ang panimuot niini hinungdan nga gilahos nila kini pagdala sa Daanbantayan District Hospital apan patay na kini.

Ang municipal health officer nga si Dr. Nicomedes Jabel mikonpirmar sa gihimo niining pakisusi nga pagkalumos maoy hinungdan sa kamatayon sa maong langyaw ug walay nakitang timailhang dunay foul play ang kamatayon niini.

Samtang ang gwardiya sa maong resort nga si Alexander Palanas mitug-an usab sa kapulisan nga mi-check in ang biktima niadtong petsa 11 ning buwana ug gitakda unta kining mogawas karung petsa 1 sa Enero sunod tuig. (Darrel Carumba ug Guam Logroño)    (BANATNEWS)