VG Sanchez pwerting tiyabawa

CEBU, Philippines - Mitiyabaw na si Bise Gobernador Gregorio Sanchez Jr. sa giingong grabeng pamolitika ni Gobernador Gwendolyn Garcia pinaagi sa dili pagpirma niini sa mga tseke nga alang sa   iyang livelihood assistance program nga iyang ipang-apod ngadto sa kabaranggayan sa matag distrito sa lalawigan sa Sugbu.

Si Sanchez nagkanayon nga karon ra kini mahitabong wala pirmahe sa gobernadora ang maong mga tseke ilabi na magkaatbang na sila sa politika.

Si Sanchez kinsa magpasubli sa pagpapili sa mao gihapong posisyon mitapon na ngadto sa Liberal Party (LP) kansang kandidato sa pagka-gobernador mao si kanhi konsehal Helario Davide III sa dakbayan sa Sugbo kinsa anak ni kanhi chief justice Hilario Davide Jr.

Gibutyag niya, nga sa milabay’ng tuig na-release dayon ang kuwarta sa iyang livelihood assistance program alang sa kabarangayan tungod kay wala pa sila magkasungi ug ang gobernadora niadtong higayona.

Mipadayag si Sanchez nga gamay ra kaayo ang kantidad sa gigahin sa iyang programa alang sa matag barangay sa matag distrito apan wala na kini paglaum pang madawat sa taga barangay karong wala na tagda sa gobernador ang pagpamirma sa mga tseke alang niini.

Alang kang Sanchez nga angayang ihikling lang unta ang pamolitika ni Garcia kay para baya sa mga katawhan sa barangay ang maong hinabang ug kun dili kini madawat sa katawhan mosamot ang ilang kapungot ug kalagot batok sa gobernadora. (Rey B. Pasaporte) (BANAT NEWS)