Christmas party sa mga tunghaan bongga bisan...

CEBU, Philippines - Bisan sa giluwatang kamanduan ni Department of Education (DepEd) Secretary Jesli Lapuz niadtong bulan sa Septiyembre ngadto sa tanang magtutudlo nga likayan ang bongga nga Christmas party sa mga tinun-an sa high school sa pampublikong tunghaan tungod sa krisis nga nasinati sa nasud duna gihapoy mga magtutudlong wala maminaw ug manumbaling sa kamanduan.

Dunay mga magtutudlo nga nangayo sa ilang mga tinun-an og amotan sa dili mominos kapin sa gatos ngadto sa P200 alang sa Christmas party.

Ang Banat News nakadawat og reklamo sa mga ginikanan ilabina diha sa lungsod sa Bantayan nga dunay eskuylahan sa usa ka barangay nga nangayo og dagko kaayong amotan ang mga magtutudlo ngadto sa ilang mga tinun-an aron ipahigayon ang party.

Gawas niini, dunay laing reklamo sa mga ginikanan nga gipapanguha'g plastic ug lata ang mga bata aron ibaligya kay matud pa, mao daw kini gamiton ang halin sa Christmas party.

Apan si DepEd-7 regional director Recarido Borgonia nga nahinabi sa Banat News dihang gikuhaan og reaksyon kabahin niini, nagkanayon nga dunay polisiya ang ulohan nilang buhatan nga magdaginot gyud ug likayan ang bonggang Christmas party sa tanang tunghaan lukop nasud.

Apan giklaro hinuon ni Borgonia ang maong polisiya wala kini magpasabot nga dili nalang usab mag Christmas party ang mga bata tungod kay kinahanglan saulogon ang diwa sa Pasko.

Apan matud ni Borgonia nga dako kining kalapasan sa magtutudlo sa wala pagtuman sa maong direktiba ni Lapuz ug iya kining pa-imbestigahan ang maong reklamo.

Gani siya nitataw nga usa ka violation sa simple office rules kun dunay penalty nga unom ka buwan nga pagkasuspenso sa usa ka magtutudlo kun mapamatud-ang sad-an subay sa resulta sa imbestigasyon.

Hinuon giklaro niya, nga kinahanglan pa sab nga masusi ang sirkumstansya kun unsa ang gibug-aton ang maong reklamo, apan matud ni Borgonia mas maayong dunay mosang-at og reklamo sa iyang buhatan aron sa ingon maleksyon kining mga magtutudlo nga susama niini ug wala motuman sa maong kamanduan ni Lapuz.

Nunot niini, gihagit ni Borgonia ang mga ginikanan diha sa usa sa mga barangay sa lungsod sa Bantayan nga ilhon kadtong mga magtutudlo ug ingon man ang school head ug ipadangat ang reklamo sa iyang buhatan aron iya dayon kining maaksyonan, apan bisan paman niini kun walay reklamo nga maabot sa iyang buhatan himuan gihapon niya og imbestigasyon.  - Rey Pasaporte (BANAT NEWS)