CEBU, Philippines - Mikabat ngadto sa P150,000 ang salaping nadala sa duha ka wala mailhing tulisan nga parehong armado nga mitulis kagahapon sa buntag sa usa ka money changer diha sa barangay Tabunok, dakbayan sa Talisay.
Ang gwardiya diha sa tapad nga ahensiya wala makapalag sa mga tulisang miparada sa ilang motorsiklo atubangan sa nahisgutang ahensiya.
Ang Jevi Money Changer nga gitulis gipanag-iya ni Jesus Guillen apan atol sa insidente ang igsuon niining si Romeo Guillen ug ang ilang pag-umangkon nga si John-John Obes maoy nagbantay.
Sila si PO3 Mikie Espina, PO2 Leandro Azarcon ug ang mga Field Training Police ang daling miresponde sa maong insidente.
Si Azarcon nga nahinabi sa mga tigbalita nagkanayon nga usa sa mga suspetsado ang nagpa-ilis og $5 human sa pila ka minutos mibalik kini ug nabantayan ni Obes (kinsa niadtong tungura diha sa gawas) nga nagbagal na ang atubangan niini dayon misunod ang usa ka lalaki. Matud ni Azarcon nga ang unang lalaki dunay gitas-on nga 5’8-5’9 dakuon ug panglawas, Tagalog ug Cebuano speaking samtang ang ikaduhang lalaki dunay gitas-ong 5’6 kasarangan ang panglawas.
Si Obes nga nahinabi sa mga tigbalita nagkanayon nga usa sa mga lalaki ang miguroy kaniya ngadto sa sulod sa ilang establisamento ug midarok kaniya diha sa lingkuranan ug ang usa mikuha sa kwarta nga diha sa iyang uyoan diin nahitabo pa ang linayogay.
Ang maong mga tulisan milarot usab sa connection sa telepono aron dili makatawag og polis ang mga biktima ug daling mibiya sa dapit padulong sa barangay Poblacion.
Ang maong establisamento dunay surveillance camera apan wala kini mag-andar niadtong tungura.
Mao na kini ang ikaduhang higayon nga gitulis ang maong money changer sulod sa duha ka tuig, niadtong buwan sa Oktobre sa milabay’ng tuig gitulis usab sila ug giingong mao ra gihapon ang panagway sa mitulis kanila kaniadto ug kagahapon. - Brenda D. Batuto (BANAT NEWS)