CEBU, Philippines - Napakyas ang katuyoan sa napanday nga balaod nga Oil Deregulation Law nga tumong unta mao nga mapamenusan ang pagpaburot sa presyo sa petrolyo dinhi sa nasud gumikan kay nawad-an na og kontrol hinuon ang gobiyerno sa mga dagkong oil players.
Kini maoy nakitang kapakyasan ni sixth district congressional aspirant Rene 'r.e' Espina Jr. ug bugtong nakita niyang solusyon mao ang pagpabalik sa Oil Price Stabilization Fund (OPSF).
Si Espina nagkanayon sa mga tigbalita nga ang OPSF dako kaayo og epekto nga pangontra sa labihan pagtaas sa presyo sa produktong petrolyo.
Gipasabot niya nga ang matag uno porsiyentong pagsaka sa presyo sa nag-unang palaliton naggumikan kini sa kapin 30 porsiyentong pagsaka sa presyo sa petrolyo apan kun ibalik ang OPSF dili makapatuyang ang mga dagkong oil companies pagpataas sa presyo sa produktong petrolyo.
Siya mipasabot nga sa iyang tan-aw ang Oil Deregulation Law karon nahimong wala’y bili tungod kay imbes mapugngan ang presyo sa lana nagpatuyang naman hinuon og usbaw ang mga dagkong kompaniya sa lana pinaagi sa pagsabot-sabot.
Matud ni Epina nga usa sa solusyon niini mao ang paghatag og investment credit nga 15 porsiyento ang mga gagmay’ng komersyante sa lana, para makapatukod sila og bag-ong depot nga sudlanan sa gasolina ug diesel aron sa ingon dunay kaponduhan sa lana sa higayon nga momahal ang matag barel sa world market.
Si Espina miingon nga kun palaron nganha sa Kongreso, iyang awhagon ang presidente sa nasud nga mopagawas og executive order aron mahatagan og kahigayonan ang mga gagmay’ng negosyante sa lana makatupong sa dagkong oil players.
Kini pinaagi sa pagpaubos sa interes sa matag kapital nga utangon. Nagtuo si Espina nga kun napatuman lang ang OPSF karon gibana-bana niyang mokantidad lang og P20 ang matag litro sa petrolyo karong panahona.
Gidasig hinuon ni Espina ang mga botante sa probinsya sa Sugbu ilabina sa iyang distrito nga pilion og maayo ang ilang botohan karong eleksyon sunod tuig sanglit importante kaayo ang ingtegridad ug kapabilidad sa mga politiko nga ilang pagapilion.
Gisugyot hinuon niyang angayang amendahon sa kongreso ang Oil Deregulation Law kay nagkinahanglan kini og kausaban sa estraktura ug industriya. (Rey Pasaporte) (BANATNEWS)