Kargador tipi sa 'hilaw' nga bayaw

CEBU, Philippines - Usa ka kargador ang namatay human pusila sa iyang silingan niadtong milabay’ng gabii diha sa dalan Figueroa sa barangay San Nicolas Proper ning dakbayan.

Si Jeremias Gabica Tañola, 26, residente sa maong dapit gikatahong gipusil sa iyang silingang si Cipriano “Estoy” Rivera, 43.

Matud pa sa kapuyo sa biktima nga si Florence Rivera kinsa igsuon ra usab sa suspetsado, padulong na siyang mopauli dihang iyang gikasugat ang suspek ug sa walay igong hinungdan kalit siyang gisagpa niini.

Tungod niini iyang gisumbong sa iyang kapuyo (biktima) ang gibuhat kaniya sa igsuon, ang naulahi wala maglangay daling misulong sa balay sa suspek .

Apan diha palang sa ilang pultahan sa dayong gawas sa biktima kalit kining gisugat sa suspek ug gipusil sa ibabaw’ng bahin sa tiyan, ang biktima gidala sa Cebu City Medical Center apan pipila ka oras ang milabay namatay ra usab kini.

Ang suspetsado boluntaryong mitahan sa iyang kaugalingon ngadto ni SPO4 Gualberto Abas Oroc nga iya ra usab nga silingan lakip na ang kalibre.38 rebolber nga dunay sulod nga usa ka buhing bala ug kabhang.

Matud pa ni SPO4 Rey Cuyos sa Homicide Section sa pakighinabi sa Banat News nga adunay personal nga panagbangi ang suspetsado ug ang biktima kaniadto pa.   (Lesley Caminade)    (BANATNEWS)