Nang-hostage sa Naga napriso

CEBU, Philippines - Nagtingkagol sa karsel sa Naga Police Station ang usa ka lalaki nga gipasanginlang nang-hostage og negosyante’g tanom human kini masikop sa mga polis sa dihang ang purol niini nahubo kagahapon sa kaadlawon diha sa merkado sa barangay Central Poblacion, Naga.

Ang suspetsado giila sa mga polis nga si German Panal, 44, draybaer sa traysikad ug taga Seaside, North, Poblacion, Naga.

Si Panal nakaangkon og mga bun-og sa lawas ug samad sa ulo human kini tabangi og kulata sa mga estambay ug daling gidala sa Minglanilla District Hospital ug human matambali gibalhog diha sa detention cell.

Ang biktima nakaangkon og samad sa liog tungod sa pagdul-it ni Panal og botelya mao si Loreta Ebonala, 37, taga sitio Pamutan, barangay Guadalupe, dakbayan sa Sugbo. Gidala kini sa South General Hospital.

Si PO2 Ken Cabrera, duty desk officer kagahapon mibutyag sa Banat News nga nadawat nila ang alarma mga alas 3:30 sa kadlawon ug mikabat ngadto sa tulo ka oras ang negosasyon una masikop si Panal sa dihang nakahubo kini sa purol ug nabuhian ang biktima.

Matud ni Cabrera nga base sa ilang nahipos nga report si Panal naghambin og sakit nga nervous breakdown.

Sa wala pa mahitabo ang insidente si Panal naghuwat og pasahero ug kalit lang kining mihulbot og buak nga botelya dayon labni kang Ebonala kinsa niadtong higayona nagdiskarga sa mga tanom niining baligya.

Ang botelyang buak gidul-it ni Panal ngadto sa liog ni Ebonala ug mimando kining makig-estorya sa mayor apan naatol nga wala si Mayor Valdemar Chiong tungod kay mibiyahe kini ngadto sa Manila hinungdan nga ang kura paruko sa parokya ni San Francisco de Asis ang buot niyang pakig-estoryahan, apan nag-misa kini.

Human makahubo si Panal, midugok ang mga estambay ug gikulata kini.

Si Panal nga nahinabi sa Banat News kagahapon nagkanayon nga duwa-duwa lang ang iyang gibuhat kay gusto siyang maka-ikyas sa mga tawong mialirong kaniya.

Matud niya nga wala'y dautan sa iyang gibuhat ug mihimakak kining mimandong makig-estorya sa mayor ug pari.  -  BANAT NEWS