CEBU, Philippines - Nahimong dugo-on ang Christmas party sa mga miyembro sa Mega Manila Distributor sa dalan Jumabon, sitio Panaghiusa sa barangay Carreta kagahapon sa alas 4 pasado sa kabuntagon dihang gipusil ang caretaker sa lugar nga gipahigayonan sa maong party. Ang biktima mao si Antonio Yares Tatoy, 26, caretaker sa container yard diha sa Carreta.
Matud pa sa biktima nga samtang namauli na ang iyang mga kauban sa trabaho nalingaw siya og inom ug kanta-kanta uban sa higala niyang si Dennis Tiro ug sa tulo ka wala hiilhing lalaki nga higala ni Tiro.
Apan kalit nga mi-brownout ang palibot ug taliwala sa kangitngit gipusil ang biktima sa wala hiilhing kriminal.
Maayo nalang kay igo lang natapsingan sa bala ang iyang ulo ug buktonug dali siyang gihatod ngadto sa Cebu City Medical Center.
Padayon pang gipangita sa kapolisan ang kriminal. – BANAT NEWS