11 anyos naligsan patay

CEBU, Philippines - Patay ang usa ka 11- anyos nga batang babaye human kini maligsi og sakyanan sa iyang paglabang sa karsada sa barangay Maslog siyudad sa Danao kagahapon sa alas 5:30 sa sayong kabuntagon.

Ang biktima mao si Jea Labiranes Pintoy, molupyo sa nahisgutang lugar samtang ang drayber sa Toyota Innova nga nakaligis mao si Ronilo Andales Rojo, taga barangay Baring lungsod sa Carmen.

Subay sa imbestigasyon ni SPO1 Renante Manulat, traffic investigator sa Danao City Police, gikan sa lungsod sa Carmen paingon sa dakbayan sa Sugbo ang maong sakyanan apan pag-abot sa maong lugar kalit lang milabang ang bata gikan sa tuong bahin sa karsada.

Wala makabantay ang drayber ug naigo ang biktima ug nalagpot dayon naligsan sumala pa sa mga saksi.

Daling gidala ang biktima sa Danao District Hospital apan gideklarar kini sa mga doktor nga dead on arrival.

Samtang ang drayber mipasirit palayo sa maong lugar ug pag-abot sa lungsod sa Compostela boluntaryong mitahan sa iyang kaugalingon. – BANAT NEWS