CEBU, Philippines - Gipaabot nalang sa taga Compostela nga marelibohan sa katungdanan ang ilang tresurero sa lungsod human kini isumbong ngadto sa Ombudsman Visayas sa pagkalambigit niini sa kasong pagluwat og tseke nga nagkantidad og himabaw sa P95 mil nga wala mag-agi sa buhatan sa municipal accountant.
Kini sa dihang giangkon ni municipal accountant Silvia Malacad nga wala gyud mag-agi sa iyang opisina ang tulo ka mga tseke nga balor og dul-ang P95 mil nga giluwatan ni Mayor Richie Wagas uban ni municipal treasurer Lorenzo Almodiel.
Ang pagtug-an ni Malacad nahitabo dihang giligid siya og pangutana sa mga konsehal kabahin sa mga tseke nga giingong giluwatan sa mayor ug ni Almodiel niadtong milabay’ng Oktubre 26.
Si Bise Mayor Joel Quinio sa Compostela mibutyag sa Banat News nga nakatug-an gyud sa tinuod si Malacad dihang giligid kini og pangutana ni konsehal Joselito Reynes, ang tisrman sa committee on laws ug Konsehal Tessa Cang, ang tsirman usab sa committee on budget and finance.
Mipasidaan ang duha ka mga konsehal nga dako kaayong kalapasan sa balaod ang pagluwat og mga tseke nga wala mag-agi sa buhatan sa municipal accountant.
Si Bise Mayor Quinio nagkanayon nga may katahap sila nga kining pagpangluwat og tseke nga wala mag-agi sa municipal accountant sa lungsod usa sa mga hinungdan nga gikagitan ang ilang panudlanan ug naalakanse ang ilang budget ning tuiga og P7.5 milyones.
Gumikan niini gipasar dayon sa konseho ang usa ka resolusyon nga nag-awhag sa Ombudsman nga parelibohan si Almodiel nga gidudahan nilang nakig-konsabo sa mayor pagpagawas sa maong tseke.
Samtang si Mayor Wagas miisip nga usa kini ka matang sa pamolitika ug gibasol niya ang mga konsehal sa lungsod kay mideretso lang dayun kini pagsumbong sa mga sakop sa media nga unta mahimo ra man kining moduol kaniya aron makahatag siya og dugang impormasyon.
Si Mayor Wagas nga magpasubli pagka-mayor atbangan ni Bise Mayor Quinio kinsa maoy kandidato ni Kongresista Red Durano pagka mayor sa maong lungsod ubos sa Bakud party. (Darrel A Carumba) (BANATNEWS)