Anti-crime volunteers sa Bogo ipasusi sa PRO-7

CEBU, Philippines - Pangulo sa Police Regional Office (PRO-7) Chief Supt. Lani-O Nerez mimandong kuhaon ang mga pangalan sa tanang sakop sa City of Bogo Anti-Crime Task Force (CEBACTAF).

Si Supt. Titio Satera gimandoan niini human makadawat ang heneral og reklamo ni Kongresista Benhur Salimbangon sa 4th district nga ang maong anti-crime volunteers nang-harass og mga sibilyan.

Ang kamandoan ni Nerez gipaagi diha kang Sr. Supt. Jesus Gaquing, director sa kapulisan sa lalawigan sa Sugbu sa tuyong masusi kun tinuoray bang pag-abad sa kampanya kontra sa krimen ang ilang gihimo ug wala magamit sa mga politiko.

Gipasabot niining sama sa mga barangay tanod wala gyud silay gitugutang mga crime volunteers nga makahupot og armas labi na kun walay lisensya.

Si Rep. Benhur Salimbangon sa kwatro distrito mipadala og suwat kagahapon ngadto ni PNP Director Jesus Versoza aron ipabungkag ang maong anti-crime group tungod kay gigamit kini sa personal nga interest ni Bogo Mayor Celestino “Junie” Martinez.

Matud pa sa kongresista walay mga ‘seminar’ ang mga miyembro niini ug magtak-in sad og mga armas.

Si Nerez nagkanayon nga kinahanglang ilawom sa pagdumala sa kapolisan ang susamang mga grupo ug dili sa mga politiko ug buot sad ipa-background check sa opisyal ang tanang miyembro.

Hinuon nasayran nga giingong suportado sa ordinansa diha sa Konseho ang katukoran sa maong grupo.

Si Mayor Martinez sa pakighinabi sa Banat News mihimakak sa maong mga alegasyon ug mipasabot nga napakyas na kaniadto ang tinguha ni kanhi CPPO director Sr. Supt. Carmelo Valmoria pagpabungkag niini tungod kay legal ang katukoran niini.

Samtang giklaro sad niyang miagi og higpit nga screening ug seminars ang maong grupo ilawom sa pagdumala sa Department of Interior and Local Government ug wala say gitugutang makadala og armas sa mga miyembro gawas sa batuta.

Matud pang Martinez ang 36 niya ka CBACTF natukod duha ka tuig na ang nakalabay human mosiaw ang sunod-sunod nga insidente sa kawat sa ilang lungsod ug dako og natabang ang maong grupo pagpakunhod niini.

Di palang dugay, gipasanginlan ang mga anti-crime groups sa Maguindanao nga nalambigit sa masaker sa 57 ka tawo lakip na niini ang 30 ka mga tigbalita.

Sa milabay’ng eleksyon, nahimong init ang sitwasyon sa maong lungsod tali sa mga supporter sa nag-atbang nga mga kandidato ug usa sa insidenteng mitumaw mao ang pagkulata sa mga tawo sa usa ka photojournalist nga igo rang nagkober sa maong piniliay.   (BANATNEWS)