CEBU, Philippines - Usa ka polis ang na-stroke ug talandugon ang kahimtang human kini masukmagi sa kuto-kuto sa usa ka drayber sa taxi nga nagmaoy ug nanghagis nga ilang girespondehan niadtong Miyerkules sa tungang gabii.
Ang maong polis giilang si PO3 Rene Caverte, 48, lumad nga taga San Carlos City sa Negros Occidental apan diha madestino sa lungsod sa Oslob.
Matud pang PO2 Allan Villasorda sa Oslob police station sa pakighinabi sa Banat News nga si Caverte ug ilang opisyal nga si Sr. Insp. Juan Casipong kuyog ang ubang polis miresponde sa alarma diha sa barangay Daanglungsod tungod sa tawong nagmaoy ug nanasmag sa iyang gimanehong taxi.
Ang suspek nga gihulagway nga pwerteng huboga niadtong tungura giilang si Amid Avecena, 34, nagpuyo na sa Badian apan lumad nga molupyo sa nahitaboan ug drayber sa Juscar Taxi.
Gikatahong may mitawag sa presinto kabahin sa tawong nagmanehong hubog ug mibangga sa tanang maagiang mga basurahan sa barangay Daanglungsod ug ingon man nangyabo sa mga sulod niini diha sa dalan.
Ang mga residente napungot sa gibuhat ni Avecena mitawag sa mga polis apan dihang miabot sila si Casipong ug gimaymayan kining pakuyogon sa presinto kalit niining gisukmag sa kuto-kuto si PO3 Caverte hinungdan sa pagkalup-og niini.
Ang mga polis daling milayog sa suspek ingon man si Caverte nga nakabangon gikan sa yuta ug gipasakay kini sa ilang sakyanan ug gidala sa presinto, gikatahong nahibulong silang si Caverte nagpunay og hilom-hilom diha sa sakyanan ug sa ilang pagkanaog nahibilin kini.
Dihang ilang gilingi mao nalay ilang nakit-ang nagkamang si Caverte sa yuta gikan nanaog sa sakyanan ug dihang ilang gidala sa tambalanan giingong na-stroke kini.
Si Caverte naa pa karon sa intensive care unit sa Visayas Community Hospital ug gipasaligan ni Sr. Supt. Jesus Gaquing nga ilisan sa mga nagastos sa tambalanan.
Samtang si Avecena gipasakaan og kasong direct assault ug malicious mischief. - Guam Logroño (BANAT NEWS)