CEBU, Philippines - Midangop sa kapolisan ang ginikanan sa usa ka “special child” human kini lugosa sa usa ka manindahay og pan sa barangay Gun-ob dakbayan sa Lapulapu sa milabay'ng gabii.
Ang biktima usa ka 19 anyos nga dalagang “special child” ug residente sa maong dapit, samtang ang gitumbok nga milugos kaniya mao si Israel Buangog Istorista, 21, minyo ug stay-in worker sa usa ka bakery isip rolling store sa pagpamaligya og pan.
Matud pa sa ginikanan nakamatikod silang dunay di maayong gipamati iyang anak maong ilaha kining gisukit-sukit ug kini mitug-an nga giamong-amongan sa maong suspetsado.
Apan si Istorista nga nahinabi sa Banat News mihimakak niini ug wala siya masayod nga wala sa maayong pangisip ang dalagang silingan ug wala siya makabantay sa kahimtang niini.
Sa imbestigasyon sa kapolisan nasutang gidala sa suspek ngadto sa Canjulao ang biktima ug didto kini gipanamastamasan, apan matud pa ni Istorista iyang gilugos ang biktima apan wala kini niya gidayon human kini mikisikisi.
Si Istorista nasikop sa kapolisan sa Station 3 ni PO3 Esperedion Arzaga Blancia Jr. ug mga kaubanan diin anaa na sa detention cell sa kapolisan sa Lapulapu ang suspetsado. - BANAT NEWS