Gisulod sa balay girakrakan patay

CEBU, Philippines - Wala na makabangon pa ang 54-anyos nga lalaki human gitabangan og pusil sa duha ka nagmotor nga lalaki samtang ang biktima naghigda sulod sa iyang tindahan diha sa sitio Maraat barangay Matab-ang siyudad sa Toledo niadtong Miyerkules sa alas 3:45 sa hapon. Ang biktima mao si Victorio Halangdon, 54, molupyo sa maong lugar samtang ang duha ka gikatahapan gihulagway lang sa mga nakasaksi nga mga hingkod na ang panuigon.

Matud pa ni SPO3 Carmelito Hornales sa Toledo City Police dihang nahinabi sa Banat News subay sa inisyal nga imbestigasyon ang biktima nagpahuway sa lantay dihang kalit nanulod ang mga gikatahapan ug nagtinabangay pagpusil kaniya.

Sumala pa sa mga saksi nga ang mga gikatahapan luwan sa kolor itom nga motorsiklo ug mibilin sa ilang gisakyan diha sa gawas dayon diretso og sulod sa tindahan ug diha-diha nadungog na ang paka sa buto sa armas.

Human niini yano ra usab kaayong nanggawas ug nibalik og sakay sa ilang motorsiklo ang duha ug mipasirit palayo sa maong lugar.  - Darrel Carumba (BANAT NEWS)