Safehouse sa masaker gironda sa Cotabato

CEBU, Philippines - Gironda sa hiniusang pwersa sa kapolisan ug military ang gidudahang safehouse nga maoy gitaguan sa gidudahang mga armas nga gigamit sa masaker sa 57 ka tawo nga naglakip sa 30 ka mga sakop sa media sa Maguindanao niadtong milabay'ng semana.

Sa report sa GMA News nga ang Joint Task Force 12 Alpha misakmit sa daghang mga high-powered nga armas, mga bala, usa ka Granada ug mga military paraphernalia sa usa ka safehouse nga gipanag-iya sa usa ka Inspector Saudi Mokamad sa Cotabato City.

Lakip sa nasakmit ang mga motorsiklong gituuhang gigamit sa mga suspek nga mimasaker sa mga biktima sa Barangay Salman sa lungsod sa Ampatuan Maguindanao.

Sumala pa sa report nga sakop si Mokamad sa 1502 Provincial Police Mobile Group apan sulod sa pipila na ka adlaw wala na kini mo-report og balik sa iyang unit.

Matud pa sa kapolisan sa Cotabato nga si Mokamad gikunsiderar nang naa sa estado sa absence-without-leave (AWOL).

Sa report gihapon sa GMA News kagahapon sa buntag, gikatahong nasigpatan si Mokamad nga mi-park sa iyang sakyanan sa maong balay dihang nalabyan sa usa ka military intelligence officer.

Gikatahong si Mokamad mihangyo sa maong sundalo nga magpatabang sa pagdiskarga sa mga armas nga maoy gigamit sa pagpatay sa mga biktima niadtong milabay'ng semana.

Ang task force padayon pa karong nag-imbestigar sa hitabo lakip na sa nasakmit nga mga armas ug motorsiklo.

Samtang sa kaulohan, ang Philippine Center for Investigative Journalism mipagawas sa opisyal nga talaan sa mga martyr nga mediamen nga nakalas sa maong masaker kuyog sa mga kabanay sa mga Mangudadatu ug sibilyan.

Gatusan ka mga mediaman ug mga human rights activists milusad og protesta duol sa Malacañang agi og panawagan sa kagamhanan pagkab-ot sa hustisya sa mga biktima.

“We call for justice,” panawagan pa ni Benny Antiporda, ang pangulo sa National Press Club, sa giandam nga pamahayag. “The whole world has shown its disgust over what happened. The media workers killed in the massacre were not armed,” dugang pa niini sa report sa GMA News.

Sumala pa sa National Union of Journalists nga 59 na ka tigbalita ang gipatay dinhi sa nasud sukad 2001, wala pay labot ang gimasaker sa milabay'ng semana. (BANATNEWS)