CEBU, Philippines - Si acting vice mayor Alan Bucao ug kanhi bise mayor Aberdovey Belleza sa dakbayan sa Talisay pulos nagpaabot sa desisyon ni Kongresista Eduardo Gullas kung kinsa kanila ang pilion nga mahimong runningmate ni Mayor Socrates Fernandez sa umaabot nga eleksiyon sa tuig 2010 sa dakbayan sa Talisay.
Ang duha pulos kaalyado ni Gullas, apan base sa pamahayag ni Bucao, siya'y gitanyagan sa nahauna nga himoong running mate ni Fernandez.
Apan si Belleza usab giingong maoy gipili sa mga sakop sa konseho sa Talisay ug anaa na siya sa long list nga gitunol nila ngadto kang Gullas aron himoong runningmate sa incumbent mayor.
Si Bucao mibutyag sa Banat News kagahapon nga barogan niya ang iyang pagsanong sa tanyag sa kongresista nga siya maoy mahimong runningmate ni Fernandez ug naghuwat lang siya sa desisyon ni Gullas.
Apan kung dili siya maoy pilion ni Gullas dili siya mokandidato sa umaabot nga eleksiyon ug gihimakak niini ang taho nga matud pa modagan isip independente.
Si Belleza sa iyang bahin nagkanayon nga kung dili siya maoy pilion ni Gullas dili usab siya molansar sa umaabot nga election ug tahuron niya ang desisyon sa Kongresista.
Si Belleza mibutyag nga niadtong Lunes, siya, Fernandez ug Bucao gimiting ni Gullas ug ilang nasabutan nga mag-agad sila sa desisyon sa naulahi. Niadtong Biyernes ang grupo sa administrasyon sa Talisay gitakda na untang moduso sa ilang Certificate of Candidacy (COC) apan wala madayon tungod kay wala makompleto ang ilang line-up dihang ang kapitan sa Tabunok nga si Manuel Cabriana ug ang kapitan sa Lagtang nga si Celiapo Cabuenas mibalibad nga dili managan isip konsehal sa siyudad.
Si Konsehal Rodulfo Cabigas mitug-an usab sa Banat News nga giuswag sa grupo karong adlawa ang pagduso nila sa COC ug una nila kini buhata motambong una sila sa Santos nga Misa karong alas 7:00 sa buntag diha sa Santa Teresa de Avila Parish sa barangay Poblacion. – BANAT NEWS