CEBU, Philippines - Dugang duha ka mga testigos ang mipatim-aw kabahin sa nahitabong masaker sa Maguindanao sumala pang Justice Secretary Agnes Devanadera ug parehong mihatag sa mga detalye sa planong masaker ug unsay nahitabo.
Sa report sa ABS-CBN gikan sa radio dzMM, si Devanadera miingon nga usa sa mga testigo nangangkong diha gyud siya paghimo sa plano sa masaker samtang ang laing testigo nangangkong usa siya sa 100 ka mga armadong mipatay sa kapin 60 ka tawo niadtong milabay’ng adlaw’ng Lunes.
Matud pang Devanadera ang duha gidala na karon ngadto sa General Santos City ug gihikay na sa mga prosecutors ang ilang aplikasyon sa Witness Protection Program.
Dugang pa niya nga duna nay kapin sa 20 ka testigos nga miduol sa mga imbestigador ug prosecutors sukad nga giaresto si Datu Unsay Mayor Andal Ampatuan Jr., kinsa maoy gipasanginlang prime suspect sa masaker, dako iyang pagtuong duna pay laing direktang niapil sa masaker nga mopatim-aw unya ug motestigo batok sa mga Ampatuan.
Samtang duna pay laing testigo nga giingong mipadayag og kooperasyon nga maoy makatudlo asa gihipos ang mga armas nga gigamit sa krimen apan kini nabalaka sa seguridad sa iyang kabanay.
Matud pang Devanadera nga ang unang nakumpiskar nga mga armas gikan sa mansyon sa mga Ampatuan dili mao ang mga gigamit sa pagpatay tungod kay kini mga karaan samtang ang mga balang nasakmit ilang pinalit gikan sa Provincial Police headquarters.
Gipasalig usab niyang duna pay dugang arestuhon sa mosunod nga mga adlaw, lakip ang walo pa ka mga miyembro sa pamilyang Ampatuan.
Samtang si administration Senator Miriam Defensor Santiago nagkanayon nga dili lang multiple murders ang angayang gipasaka batok kang Datu Unsay Mayor Datu Andal Ampatuan Jr., nga mikalas sa 57 ka tawo lakip mga kababayen-an ug mga sakop sa media.
Sa press statement ni Santiago, kinsa usa ka kanhi regional trial court judge nga ang pagpatay og ingon niana kadaghan sa Maguindanao makunsiderar nang terorismo, sumala pa sa report sa GMA News.
Matud pa niya nga di paigo ang multiple murder sa rason nga “the suspects were in effect spitting with impunity at the rule of law.” Matud pa niya nga kinahanglang amendahan dayon ang complaint ngadto na sa terrorism, dugang usab niya nga basin hasta ang inquest gidali-dali paghimo.
Apan si Press Secretary Cerge Remonde miingon nga bahala na niini ang DOJ sa kasong ipasaka. (Edwin Ian Melecio, gikan sa Wires) (BANATNEWS)