CEBU, Philippines - Moduso na sa ilang Certificate of Candidacy (CoC) ugmang adlawa ang mga kandidato sa Bando Osmeña Pundok Kauswagan (BOPK) pinanguluhan ni Cebu City Mayor Tomas Osmeña ingon man ang oposisyon nga Kugi Uswag Sugbu.
Alas 9:00 sa buntag magtapok ang mga kandidato ug mga tigpaluyo sa BOPK alang sa usa ka Santos nga Misa sa dili pa moadto sa buhatan sa Comelec sa siyudad.
Nagdumili hinuon pagbutyag ang mayor kung kinsa ang ilang mga kandidato pagkakonsehal sa north district hangtud makaduso sila sa ilang CoC ugmang adlawa, apan usa ka kasaligang tinubdan nga dili gustong magpaila mibutyag sa mga kandidato pagka-konsehal sa BOPK sa amihanang distrito.
Gawas sa mga incumbent councilors nga sila si Edgardo Labella, Augustus Pe Jr, ug Leah Japson, ang bag-ong nadugang mao sila si NGO organizer Alvin Dizon, barangay Talamban kapitan Alvin Arcilla, barangay Luz kapitan Nida Cabrera, barangay Pahina Central kapitan Sisinio Andales ug ang kanhi barangay kapitan sa Sambag 2 nga si Noel Wenceslao.
Bugtong gikompirmar ni Osmeña mao ang ilang standard bearer nga si Mike Rama uban sa pagpares ni Joy Augustus Young pagkamayor ug bise mayor.
Samtang nakadesidir na usab si Osmeña nga magpapili pagka-kongresista sa south district samtang si Cutie del Mar maoy kandidato pagkakongresista sa north district. Lakip sa mosumitir sa ilang COC ngadto sa buhatan sa Comelec ugmang adlawa mao ang pipila ka sakop sa Kugi Uswag Sugbu (Kusug).
Nagdumili pa hinoon pagbutyag ang pangulo sa Kusug nga si kanhi Mayor Alvin Garcia pagbutyag sa ilang kompletong lineup.
Apan gibutyag ni south district congressional aspirant Jonathan Guardo nga lakip sa ilang mga kandidato pagkakonsehal sa north district mao sila si Dandy Fernan, Fritz Quiñanola, ug Raymond Garcia uban sa ilang kandidato pagkakongresista sa distrito nga si Lahug barangay captain Mary Ann delos Santos.
Samtang gikompirmar usab ni Guardo nga lakip sa magpapili pagkakonsehal sa south district mao sila si Cogon-Pardo barangay captain Eugenio Gabuya, kanhi Punta Princesa barangay captain Jose Navarro ug ang gipalagpot nga kapitan sa Poblacion Pardo nga si Danilo Lim.
Sama kang Garcia, nagdumili una paghingalan si Guardo sa ilang kandidato pagkamayor ug bise mayor sa umaabot nga eleksyon, apan kini mipasumbingay nga ang gipilian nila karon mao si GSIS president Winston Garcia ug ang ig-agaw niining kanhi mayor.
Gipasalig ni kanhi mayor Garcia nga makompleto ang ilang lineup atol sa deadline sa filing sa CoC unya sa Disyembre 1 nga mao usab ang i-file sa uban nilang kandidato.
Gawas sa BOPK ug Kusug, ang mga kandidato sa Go Cebu ni Georgia Osmeña gitakda usab nga moduso sa ilang CoC ugmang adlawa. (Elly Bolonos) (BANATNEWS)