CEBU, Philippines - Nalandig sa tambalanan ang usa ka 21-anyos nga lalaki human kini pusila sa duha ka wala hiilhing tawo sa sitio Kilawan, barangay Tanke, dakbayan sa Talisay niadtong Huwebes sa kaadlawon.
Si Kennedy Batcho alyas “Eladia” nga taga sitio Kimba, barangay Cansojong sa nahisgutang siyudad nasabak sa tiyan, walang bukton ug likod nga bahin sa lawas.
Base sa imbestigasyon nila ni PO3 Mikie Espina ug PO3 Arnold Damasco, nasayran nga si Batcho kuyog sa uyab niini diha sa Julings Kilawan sa sitio Kilawan, dihang ang duha ka wala hiilhing lalaki kalit lang mitunga ug sa walay pupangutana kalit gipusil ang biktima.
Gihatod dayon ngadto sa Vicente Sotto Memorial Medical Center sa dakbayan sa Sugbo ang biktima.
Si Damasco nga nahinabi sa Banat News kagahapon mibutyag nga base sa ilang nahipos nga impormasyon love triangle ang usa sa motibo sa maong insidente, hinuon padayon pa nilang gi-follow-up ang maong hitabo. -Raymond D. Abarcas (BANAT NEWS)