CEBU, Philippines - Ang Malacañang dili momando sa pagparelibo ug pagpadakop kang Mayor Datu Andal Ampatuan Jr. sa lungsod sa Datu Unsay hangtod nga dili kini kapasakaan og kaso may labot sa masaker nga nahitabo nga mibilin og kapin sa 50 ka patay didto sa Maguindanao, lakip na ang mga babaye ug mga sakop sa media.
Hangtod sa pagsulat ning balita, 52 na ka tawo ang naugkat sa Maguindanao ug 12 niini nailhang mga sakop sa media.
Si Press Secretary Cerge Remonde nagkanayon kagahapon nga adunay “due process” nga angay sundon.
“We have due process to be observed also, so let us allow the investigators on the ground to come up with through their investigation,” si Remonde, sa iyang tubag ngadto kang National Union of Journalist in the Philippines (NUJP) secretary-general Sonny Fernandez atol sa pakighinabi sa ABS-CBN kagahapon.
Nangutana si Fernandez kun maparelibohan ba si Ampatuan isip mayor sa Datu Unsay samtang nagpadayon pa ang imbestigasyon.
Gitataw ni Remonde nga ang pagtaktak kang Ampatuan ug pagsikop niini himuon kun makakita og saktong ebidensiya ang kapolisan paglambigit niya sa linuog nga krimen.
Matud ni Remonde nga si Pres. Gloria Macapagal-Arroyo mismo mipasalig sa mga Mangudadatu, ang karibal sa politika sa mga Ampatuan, nga ‘impartial’ ang himuong imbestigasyon.
“It’s a very big embarrassment not only to the government, but also to the entire nation,” ang press secretary nagkanayon, kinsa midugang nga dili mohunong ang kagamhanang nasyonal hangtod dili makasuhan ug madakpan ang mga nalambigit sa masaker.
Ampatuan Gyud
Sa labing ulahing kalambuan, ang kapolisan miila gyud ni Mayor Ampatuan nga maoy nangulo sa barikada sa Saniag nga mipahunong sa convoy sa mga sakyanan sa mga Mangudadatu, midagit ug mipatay sa mga sakay niini.
Ang tigpamaba sa Philippine National Police nga si Chief Supt. Leonardo Espina mihingalan gyud ni Mayor Ampatuan sa lungsod sa Datu Unsay nga maoy responsable sa krimen.
Ang militar miila usab sa mga bodyguard ni Ampatuan nga maoy namusil sa kabanay sa mga Mangudadatu nga sakay sa convoy, lakip na ang mga sakop sa media.
Ang convoy gipanguluhan ni Genalyn Mangudadatu, asawa ni Bise Mayor Esmael Mangudadatu sa lungsod sa Buluan, Maguindanao nga paingon mosang-at og certificate of candidacy alang kang Esmael nga giingong modagan og gobernador batok kang Mayor Ampatuan nga nagplanong mosunod sa iyang amahan nga si Gobernador Andal Ampatuan Sr. sa Maguindanao.
Sa miaging adlaw, gipaubos sa “state of emergency” ang kinatibuk-ang Maguindanao ug Sultan Kudarat. Tungod niini, ang mga awtoridad makapahigayon og “random searches” ug checkpoints aron mababagan ang mga mamumuno.
Alyado
Ang mga Ampatuan sakop sa partido administrasyon nga Lakas-Kampi-CMD ug giingong adunay dakong utang kabubut-on si Pres. Arroyo sa maong pamilya.
Apan si Arroyo mimando kang presidential adviser on Mindanao affairs Jesus Dureza nga pakigkitaan ang mga Ampatuan, lakip na si Mayor Ampatuan sa Datu Unsay, aron pangayuon ang ilang kooperasyon alang sa nagpadayong imbestigasyon.
Samtang si Commission on Human Rights chairperson Leila de Lima nagkanayon sa pakighinabi sa DzMM nga ‘disturbing’ ang taho nga ang mga Ampatuan dayag nga may “unusual treatment” sa kagamhanang nasyonal.
Ang CHR, matud ni de Lima, hugot nag-monitor sa imbestigasyon sa kapolisan.
Si de Lima naka-obserbar nga wala na mapreserbar ang “scene of the crime” tungod kay ang nanguykoy sa gihimong “burial site” nga gihimo alang unta sa ilang gipang-masaker, mga sibilyan nga mga paryente sa mga biktima.
Way Labot
Aduna pay Toyota Tamaraw FX ug Toyota Vios nga nalubong sa lugar. Ang Tamaraw FX gisakyan sa anak sa konsehal sa Buluan nga walay labot sa convoy ug paingon lamang sa Cotabato, apan naapil sa masaker.
Nakadawat usab og report ang CHR nga si Genalyn gilugos sa wala pa patya. Gani, matud sa impormasyon nga nadawat sa CHR nga ang kinatawo niini adunay samad agi sa bala sa armas. Ang pantaloon sa ubang mga babaye gipanghubo na.
Ang CHR miapil sa imbestigasyon tungod sa hangyo sa mga Mangudadatu, kinsa nagtinguha usab og subsob nga ‘autopsy’ sa mga lawas sa mga biktima. – BANAT NEWS