CEBU, Philippines - Si kanhi Mayor Thadeo Ouano maoy gitudlo nga chairman sa Nationalista Party (NP) sa ikaunom nga distrito sa lalawigan sa Sugbo alang sa piniliay sa 2010.
Kini maoy katungdanan nga gitahas kang Ouano pinaagi ni Senador Manuel Villar, kinsa maoy standard bearer sa NP ug ang iyang appointment gipirmahan ni Villar niadto pang Nobiyembre 16, ning tuiga.
Si Antero Cana Jr. nga maoy tigpamaba ni kanhi Mayor Ouano mibutyag sa Banat News nga ang maong appointment gitunol ni Kongresista Cynthia Villar, asawa ni Senador Villar sa pagtambong niini sa First Asian Cooperative Teamshop Seminar niadtong miaging Biyernes sa gabii.
Matud pa ni Cana nga isip chairman sa NP sa ikaunom nga distrito, si Oauno gitahasan ni Villar sa paghan-ay sa mga mokandidato sa ika-unom nga distrito ug siya maoy mopirma sa certificate of nomination sa mga opisyal nga kandidato sa NP, mga watchers ug uban pa.
Dugang pa ni Cana nga gipasalamatan ni Ouano ang kanhi senate president gumikan sa pagtudlo kaniya nga chairman sa maong partido sa ika-unom nga distrito. - BANAT NEWS