CEBU, Philippines - Kritikal ang kahimtang sa usa ka lalaki human dunggaba sa iyang silingan sulod sa iyang balay didto sa Sitio Calamansi, Brgy. Pajo, dakbayan sa Lapulapu sa milabay'ng hapon.
Ang biktima mao si Eldrin del Carmen, 36, ulitawo apan may ka live-in, lumad nga taga Sitio Marfa, dakbayan sa Mandaue apan nangabang kini og balay didto sa Calamansi. Samtang ang suspetsado nailhan lang nga Boy Pascua alyas Negro, hingkod ug silingan ra usab sa biktima.
Si SPO1 Honorato Inihao sa Crime Against Persons (homicide) mibutyag sa Banat News nga ang biktima nagpahuway sulod sa ilang balay sa ala 1:30 ang takna sa milabay'ng hapon dihang gisaka kini sa suspetsado ug sa walay igong hinungdan gihansakan sa iyang kutsilyo.
Ang biktima kinsa nasabak sa tiyan gihatud dayon ngadto sa Vicente Sotto Memorial Medical Center sa dakbayan sa Sugbo samtang ang suspetsado nakasibat dayon ug mao kini gipangita karon sa kapolisan. - BANAT NEWS