Wala pay nag-file og COC sa lalawigan

CEBU, Philippines - Wala pay bisan usa ka nangambisyon og elective post sa gobiyerno ang nagpa-rehistro sa buhatan sa Commission on Election sa tibuok probinsya sa Sugbu atol sa unang adlaw sa Filing of Certificate of Candidacy kagahapong adlawa. Si Atty. Lionel Marco Castillano, provincial Comelec supervisor nga nahinabi sa Banat News kagahapon mibutyag nga ‘zero’ pa gyud ang tanang buhatan sa Comelec sa kalungsoran. Matud pa ni Castillano nga base sa ilang kasinatian sa pipila na ka eleksyon ang nilabay, naandan na gyud nga tulo ka adlaw sa dili pa ang katapusang adlaw sa filing anha pa magdasok ang mga gustong mokandidato aron mo-file sa ilang COCs. Si Castillano mipasidaan ngadto sa mga kandidatung naka-file na og COCs nga likayan gyud ang pagpangampanya og sayo sanglit karun pang Marso 26 sunod tuig magsugod ang kampanya sa lokal nga posisyon. “Ang stand gyud sa Comelec, base sa Section 80 sa Omnibus Election Code still applicable up to this moment, kay, they can be subject for disqualification kun mangampanya og sayo,” pasabot pang Castillano.

Hinuon iyang giklaro nga ang usa ka politiko nga maka-file na sa ilang COC mahimo gihapong makapa-interview sa mga sakop sa media apan gikinahanglan nga mohisgot lamang og isyu ug dili pangampanya sa ilang kaugalingon. Samtang iya usab giklaro nga kadtong mga politiko o bisan kadtong indibidwal nga mo-file og disqualification batok sa usa ka kandidatu adto kini ipasaka diretso sa Comelec sa Manila ug dili na sa local nga Comelec office. – BANAT NEWS