CEBU, Philippines - Ang Department of Justice (DOJ) nangandam na sa pagpakanaog og desisyon sa kasong gisang-at ni Gobernador Gwendolyn Garcia batok sa tulo ka mga dagkong kompaniya sa lana nga mao ang Caltex, Shell ug Chevron.
Si Roy Kyamko, Chief of Staff ug Sr. Undersecretary sa Department of Energy (DOE) nagkanayon nga mopagawas na unta og resolusyon ang DOJ nga pasirhan ang maong mga kompaniya apan nangayo pa og dugang higayon ang mga tagdumala niini.
Sayo niini gikiha ni Garcia ang maong mga kompaniya tungod sa kamahal sa presyo sa ilang mga baligyang gasolina ug krudo dinhi sa Cebu itandi sa Metro Manila ug Mindanao.
Gani matud pa sa gobernador nga may deperensya nga P7 ngadto sa P8 ang labaw sa presyo sa maong mga produkto dinhi sa Cebu kun itandi sa mga presyo niini didto sa Manila.
Apan sa dihang gipangutana si Kyamko kun unsay posibleng resulta ning maong kaso, igo ra siyang miingon nga ang ending niini posibleng ma-dismiss o kaha pasakaan gyud og kaso ang tulo ka mga dagkong kompaniya sa lana. - Rey Pasaporte (BANAT NEWS)