CFL bulbs ipang-apod sa VECO

CEBU, Philippines - Mang-apod unya ang Visayan Electric Company (VECO) og Compact Fluorescent Lamp (CFL) sa tanang konsumidor sa dakbayan ug Metro Cebu human sila nagpinirmahay og kasabotan sa Department of Energy (DOE) kagahapon sa buntag diha sa buhatan sa Veco sa Banilad.

Si Ethel Natera, information officer sa Veco miingon nga karung sunod semana ilang sugdan ang pag-apod sa 250 mil ka CFLs.

Matud pa niini bugtong dad-on sa konsumidor mao ang unom ka Incandescent Bulbs (IB) nga ilang pailisan og CFL diha sa ilang mga buhatan sa SM department store, Talisay ug Consolacion.

Si Roy Kyamko, chief of staff ug Senior Undersecretary sa DOE nagkanayon nga ang CFL kabahin kini sa Philippine Energy Efficiency Project (PEEP).

Tuyo niining maong proyekto nga makapanghatag og 13 milyones ka CFLs aron mailisan kadtong mga IBs sa mga konsumidor nga mas dako og kaon sa kuryente ug makapamenus sa brownout.

Dugang pa ni Kyamko ang nasud karun nag-atubang sa problema sa climate change tungod sa kataas na sa carbon dioxide, apan kun ang 13 milyones ka konsumidor mogamit na og CFL makuhaan gyud ang gidaghanon sa gibugang carbon dioxide sa kahanginan nga nakatampo sa climate change. Ang usa ka CFL nakapamenus og 200 kilong carbon dioxide. – BANAT NEWS

Show comments