CEBU, Philippines - Patay ang usa ka negosyante og balas sa dakbayan sa Talisay human kini ug iyang pag-umangkon gi-ambush sa wala pa mailhing mga armadong lalaki sa milabay'ng gabii diha sa barangay Jaclupan.
Giila sa kapolisan ang namatay mao si Henry Peizas, 43, taga sitio Ilang-ilang sa barangay Lagtang sa maong dakbayan ug naangol usab ang pag-umangkon niining si Capistrano Carillano,Jr., 25.
Samtang padayon pa ang kapolisan sa pagtumbok kun si kinsa ang mga gikatahapang mibanhig sa duha.
Matud pa sa imbestigasyon nila ni PO3 Mikie Espina, ang duha luwan sa ilang Isuzu mini dump truck gikan pa naghakot og balas sa sapa sa Jaclupan ug padulong na og lugsong sa dakbayan sa Talisay dihang kalit girakrakan ang ilang trak.
Si Henry kinsa maoy nagmaneho sa maong trak naigo diha sa walang bahin sa nawong, walang bahin sa lawas ug walang bukton, samtang si Capistrano naigo diha sa walang kamot.
Matud pa sa mga polis nga nakalayat ug nakadagan si Capistrano gikan sa mga mamumuno. Gidala ang duha sa Talisay District Hospital apan gideklarar nga dead on arrival si Peizas.
Walay nakuhang basiyo sa mga bala diha sa crime scene apan dako ang pagtuo sa kapolisan nga posibleng layo ra ang mipunting sa mga biktima.
Si Supt. Henry Biñas, hepe sa Talisay City Police Station sa pakighinabi sa Banat News mibutyag nga niadtong milabay'ng Biyernes gikatahong nakakita og lalis ang usa sa duha ka biktima diha sa maong barangay.
Dugang impormasyong nadawat sa kapolisan nga human niadtong panaglalis gikatahong duna nay kanunay'ng nag-atang sa duha sa nanglabay'ng mga adlaw apan niadtong milabay'ng gabii ra usab sila nakabalik og hakot og balas. – BANAT NEWS