Mokandidato makaparehistro na

CEBU, Philippines - Gipahibalo ni provincial Comelec supervisor Lionel Marco Castillano nga andam na ang tanang buhatan sa Comelec tibuok probinsya sa Sugbu sa pagpanawat niadtong mga politiko nga gustong mo-file sa ilang sertipiko de kandidatura sa unang adlaw sa filing karung umaabot Biyernes.

Si Castillano nga nahinabi sa Banat News nagkanayon nga duna na sila’y guidelines ug porma nga papil-apan sa mokandidato sa local nga posisyon atol sa pagbukas sa filing karung Biyernes.

Apan iyang gipasabot kinahanglan ang mga mokandidato mao nay mopa- xerox sa guidelines ug porma sanglit usa lang ka kopya ang anaa sa Comelec offices ug magdala na lamang daan og picture ang mga mokandidato.

Gawas pa niini, gipadayag usab niyang giwagtang na karun sa Comelec Central office ang drugtest sa mga mokandidato human dunay misang-at og petisyon kabahin niini human sa piniliay niadtong tuig 2007.

Si Castillano nidugang nga wala pa siya’y nakitang lugar dinhi sa probinsya sa Sugbu nga posibleng ilhong hot spots sa umaabot eleksyon sunod tuig apan sila ug ang kapolisan mipahigayon na og command conference aron pagtino sa mga dapit nga hot spots, hotly contested areas ug areas of concern.

Hinuon miingon si Castillano nga sa nanglabay nga piniliay walay lugar dinhi sa Sugbu nga nadeklarar nga hot spots, gawas lang sa kinatibuk-ang 4th district nga ilang gipaubos sa immediate area of concern ilabina ang tulo ka mga lungsod sa Bantayan Island nga naglangkob sa Sta. Fe ug Madridejos.

“Karon ato pang tan-awon kay base man gud na sa mga kategoriya, history sa usa ka lugar nga dunay election violence, close political rivalry, threats and act of terrorism and violence, mao nay mga criteria namo nga tan-awon pero so far wala paman,” matud pang Castillano. (Rey Pasaporte)    (BANATNEWS)