CEBU, Philippines - Duha ka lalaki ang gipamusil patay samtang naglakaw sa karsada paingon na untang mamauli sa ilang tagsa-tagsa ka pinuy-anan sa ngitngit nga bahin sa Das Landing barangay Lutopan siyudad sa Toledo niadtong Lunes sa alas 11:00 sa gabii.
Ang mga biktima nga pulos namatay mao sila si Samuel Recta Reponte, 25, ug Jaime Ravanes Sasan, 30, pulos mga molupyo sa Daspo, Lutopan siyudad sa Toledo.
Gipangita pa karon sa kapolisan ang duha ka wala mailhing lalaking gitumbok nga maoy mirakrak og bala sa duha kinsa daling mikagiw human sa pagpamusil.
Matud pa ni SPO3 Gil Lastimosa sa Toledo City Police dihang nahinabi sa Banat News, gikan pa ang mga biktima nanuroy sa Sitio Dapdap, Lutopan ug nanglakaw nga nag-estoryahanay paingon nga mamauli dihang girakrakan.
Subay sa pasiunang imbestigasyon ang mga biktima pulos nakaangkon og daghang samad sa kalawasan sagad diin niini sa bukobuko ug tiyan nga maoy hinungdan sa ilang hinanaling kamatayon nga wala na madala pa sa tambalanan.
Ang kapulisan nisubay karun sa background sa mga biktima aron matugkad ang posibleng motibo sa krimen diin kasamtangan karung gipahiluna sa Saint Francis Funeral Homes sa maong siyudad alang sa awtopsiya. (BANATNEWS)