Jagmoc wa i-junk sa BOPK

CEBU, Philippines - Gihimakak ni Mayor Tomas Osmeña nga ilang gi-junk si Konsehal Edwin Jagmoc sa Bando Osmeña Pundok Kauswagan (BOPK) tungod kay matud pa sa mayor kabubut-on sa konsehal ang dili na magpasubli sa katungdanan sa umaabot nga eleksyon ug dili ilang desisyon.

Pabilin hinuong nagdumili si Osmeña pagbutyag sa rason ni Jagmoc pagkab-ot sa iyang desisyon nga mopahuway na sa politika sunod tuig.

Gipadayag sa mayor nga walay angayang ipasabot ang konsehal sa publiko tungod kay kini padulong nang mogawas sa katungdanan.

“If he is going to run then he has to explain, somebody doesn’t want to run then he doesn’t have to explain, he is entitled to his own personal reason,” sumala pa ni Osmeña. Dunay mga pagduda nga ang paglambigit sa konsehal sa kinabuhi sa usa ka sakop sa Mayor’s Management Team (MMT) maoy hinungdan sa nakab-ot niining desisyon.

Hugtanon na hinuon kining gipanghimakak ni Jagmoc ingon man ni Misty Majistrado ug mismong ang asawa sa konsehal ang maong isyu.

Ang opposition leader sa siyudad nga si Jonathan Guardo maoy nagduda nga gi-junk si Jagmoc sa BOPK hinungdan nga kini dili na magpapili pag-usab. (BANATNEWS)