Mayor sa Madridejos motubag sa reklamo sa bise

CEBU, Philippines - Andam atubangon ni Mayor Salvador dela Fuente sa Madridejos ang kasong gipasaka ni Bise Mayor Doroteo Salazar diha sa hunta probinsiyal kalabot sa pasangil nga pag-‘tamper’ sa ordinansa nga gipalabang alang sa budget alang ning 2009.

Si Salazar mipasaka og kaso batok kang dela Fuente, mga sakop sa konseho, ug mga department heads tungod sa pasangil nga wala niya pirmahi ang ordinansa tungod sa iyang pagkuwestyon sa budget alang sa ‘personnel services’ sa lungsod nga milapas sa 55 porsiyento nga gilatid sa Commission on Audit.

Apan gibutyag ni dela Fuente sa dihang nahinabi sa usa ka estasyonan sa radyo nga nasurpresa sila sa pagpasaka sa maong kaso ni Salazar batok nila. Gibutyag niya nga gi-aprobahan na sa konseho ug sa hunta probinsiyal ang maong budget ug bugtong si Salazar lang ang wala mopirma niini.

Si Salazar mipadala og opposition letter ngadto sa hunta probinsiyal.

Matud ni dela Fuente nga maklaro kaayo nga pagsamoksamok lang ang gihimo sa bise mayor. Nagtuo usab kini nga adunay bulok politika ang pagreklamo ni Salazar tungod kay mibulag kini sa ilang grupo ug nagplano nga magpapili pagka-mayor atbang kaniya sa 2010 nga eleksiyon.

Gipasalig hinuon sa mayor nga andam nilang tubagon ang reklamo ni Salazar.

Si Salazar nangatarungan usab atol sa pakighinabi sa samang estasyon sa radyo nga wala siya mopirma sa maong ordinansa tungod kay ang gigahin alang sa personnel services (suholan sa mga opisyal ug mga kawani) milapas sa 55 porsiyento sa kinatibuk-ang pundo. Matud niya nahasupak kini sa COA. Gibutyag niya nga gibadlong na silang daan sa COA mahitungod niini.

Matud ni Salazar nga iya nang gisuwatan ang mayor ug ang mga kaubanan niya sa konseho nga dili siya mopirma sa maong budget hangtod nga kini makurehian aron dili unya sila magproblema ini’g audit sa COA.

Gikahibulong usab sa bise mayor nganong usa ka konsehal ang mi-hand carry sa ordinansa alang sa annual budget sa lungsod sa Madridejos ngadto sa hunta probinsiyal nga unta ang municipal treasurer man ang adunay gahum pagbitbit niini ngadto sa Kapitolyo.

Nasayran nga si Konsehal Emie Matis-Gabito maoy nahatod sa ordinansa ngadto sa Sangguniang Panlalawigan sa Sugbo. – BANAT NEWS