CEBU, Philippines - Usa ka suspetsadong drug pusher nga may warrant na, nakaipsot sa pagpangronda nga gihimo sa mga polis didto sa sitio Rattan, barangay Tanke, dakbayan sa Talisay kagahapon sa buntag.
Ang suspetsado mao si Alex Saballones, 54, nga taga sitio Rattan, wala hisakpi nila ni S/Insp. Isagani Abalo ,deputy chief sa Talisay City Police Station, PO3 Rey Bucao, PO2 Narciso Alforque, PO3 Benedicto Lasque, PO2 Jundave David ug PO2 Roy Lofranco, hinungdan nga wala ikasilbi niini ang search warrant nga giluwatan ni Regional Trial Court (RTC) Judge Soliver Peras sa Branch 10. Si Abalo nga nahinabi sa Banat News kagahapon mibutyag nga dihang paingon na silang mosulod sa balay ni Saballones, ang maong suspetsado diha sa ikaduhang andana apan wala nila hibantaye nga hilom kining nanaog hinungdan nga nakaikyas.
Sa gipahigayong pagsiksik sa balay ni Saballones na-recover sa mga polis ang mga shabu nga giputos sa usa ka medium nga pakete, usa ka gamay'ng pakete ug siyam ka gamay'ng silver nga pakete nga gisulod sa usa ka medium nga plastik ug mga shabu paraphernalia. - BANAT NEWS