CEBU, Philippines - Ang kaabtik sa kabomberohan sa pagpawong sa sunog sa sitio Libertad, barangay Alang-Alang, dakbayan sa Mandaue kagahapon maoy nakapugong sa lain na usab untang dakong impiyerno sa maong dakbayan.
Apan bisan pa niini naibanan gayud og tulo ka balay ang maong sitio sa paningkamot sa mga bombero.
Si FO3 Cefriano Codilla, imbestigador sa kabomberohan sa maong dakbayan nga nahinabi sa Banat News miingon nga nagsugod ang kayo sa balay ni Oscar Mejares ug gumikan kay dali nilang nasirkulohan pinaagi sa mga fire truck ang palibot niini, hinungdan nga ang kayo wala makatapon ngadto sa sikbit nga mga balay sa maong dapit.
Matud pa ni Codilla nga miulbo ang kayo sa alas 7:46 ang takna sa gabii didto sa ikaduhang andana sa balay ni Mejares ug maayo gani kay abtik kaayong miambak sa bintana ang naulahi hinungdan nga nasalbar kini.
Matud pa niya nga ginama sa semi concrete ang duha ka andanang panimalay ni Mejares apan nakatapon pa ang kayo ngadto sa ikaduhang balay nga naugdaw usab.
Dugang pa niya nga naangin ang sikbit nga balay nga gipanag-iya ni Edgar Baylosis apan dali nila kining napawong dihang gipasiritan nila sa ilang hose sa tubig.
Si FO3 Codilla nagkanayon nga gipaubos ni Mandaue City Fire Marshall Oscar Mayol sa 2nd alarm ang maong sunog busa nakontrolar nila sulod lang sa 3 minutos apan nabinlan gyud og P400,000 nga kantidad sa mga kadaot. (Romeo T. Limpangog ug Bong Soriano) (BANATNEWS)