Pagsaway sa mayor di tagdon

CEBU, Philippines - Di na tagdon ni Governor Gwendolyn Garcia ang mga pagpanaway nga gibato kaniya ug sa Kapitolyo ni Cebu City Mayor Tomas Osmeña.

 Matud pa ni Garcia nga ang alang kaniya wala nay bili ang paghatag og atensyon sa mga pagsaway sa nagmasakitong tawo.

 Ang gobernadora nagkanayon nga mas palabihon pa niyang humanon ang mga nasugdang proyekto ug programa niining iyang ikaduhang termino sa pagkagobernador sa lalawigan sa Sugbu.

 Sa sayo pa, si Osmeña mipagawas og pamahayag nga nag-ingong pagpanglawgaw lamang ang unsolicited advice sa gobernador ngadto sa SM City management nga dili dayonon ang planong pagpalit og lote diha sa South Road Properties kon SRP kay siguradong mag-atubang kini og kaso.

Niining bag-o lang gipadayag sa mayor nga pagpakaaron-ingnon lamang ang desisyon sa gobernador nga dili na dayonon ang pagpahawa sa mga residente sa barangay Apas sa rason nga walay papel nga gipirmahan ang gobernadora.

Apan ang tigpamaba sa Kapitolyo, si Atty. Rory Jon Sepulveda sa interview sa DyRF nagkanayon nga ang gihimo sa Kapitolyo pagpakita lamang nga dili sila bias sa Filinvest.

Ang Filinvest mipalit na og 40 ka ektaryang luna sa SRP aron i-develop. Dungan sa Filinvest ang Kapitolyo nga miapil sa bidding apan ang naulahi wala makapasar sa rekisitos nga gipangayo sa dakbayan hinungdan karon sa kasungian sa duha ka local government unit. (Chester Abadilla)    (BANATNEWS)