Red mihimakak sila'y nagpadakop kang Wagas

CEBU, Philippines - Kusganong gihimakak ni Kongresista Rep. Ramon Red Durano VI sa ikalimang distrito ang pasangil sa managsuong Gilbert ug Ritchie Wagas nga mayor sa lungsod sa Compostela nga may kalambigitan sila sa pagpadakop kang kanhi mayor nga si Gilbert.

Sa gipadalang tubag sa kampo ni Durano pinaagi sa text, kini mihimakak sa kalambigitan ug mibutyag nga dihang nakombikto si Wagas wala pa mahimong kongresista si Durano.

“Kadto allegations nga si Cong. Red (Durano) maoy nagpadakop ni Gilbert (Wagas) because modagan siya against him, or ‘threatened ang mga Duranos sa iyang pagdagan, ridiculous because sa una pa man na siya nikontra ni Congressman Red sa 2007 pa nga election. Kung threatened pa sa una ra unta na siya gipadakop. He is not a threat! Cong. Red is anticipating na naa jud siyay mga kontra come 2010 elections,” matud pang Yami Vestal sa buhatan ni Rep. Durano.

Dugang pang Vestal nga matag dunay mahitabong isyu sa mga Wagas kanunay nilang ipangangkon nga politically motivated ang nahitabo ug kanunay'ng pasanginlan ang mga Durano, matud pa niini nga 2003 pa ang pagkakombikto apan nag-ungot lang sa Sandiganbayan

Ang kanhi Mayor Gilbert Wagas sa lungsod sa Compostela nagkanayon nga ang bench warrant gikan sa Sandiganbayan nga gi-serve sa mga ahente sa National Bureau of Investigation (NBI) bahaw na tungod kay niadto pa kining Hulyo 02, 2003.

Si Mayor Ritchie Wagas, manghod ni Gilbert sa gipadalang dokumento sa Banat News nagkanayon napulo ra ka adlaw ang bili sa maong bench warrant, giingon usab nilang dunay pruwebang nagtinguha og kopya sa resulta sa kaso si Durano diha sa Korte Suprema apan kini gi-deny kay walay labot niini ang kongresista.

Ang ilang kampo gikatakdang mokwestyon sa legalidad sa pagdakop ug ang kombiksyon sa kanhi mayor kinsa gidala na kagahapon ngadto sa Ombudsman 4th Division ug gibilanggo na sa Muntinlupa kagahapon samtang gipaabot pa ang husay sa ilang mosyon.  –  BANAT NEWS