Ex-VM kritikal, misis patay sa tulis

CEBU, Philippines - Patay ang asawa ug kritikal ang kahimtang sa kanhi bise mayor sa lungsod sa Barili human kini gitulis ug gipamusil sa duha ka mga wala mailhing mga lalaki nga nagtaptap sa ilang nawong atol sa paghiabot sa pinuy-anan sa barangay Mantalongon, Barili niadtong Miyerkules sa alas 8:45 sa gabii.

Ang magtiayong Luisito Ponseca, 50, ug Gina, 45, gikan nag-withdraw og dakong kantidad sa kuwarta dinhi sa dakbayan sa Sugbo sa dihang gipamusil.

Matud ni PO3 Job Sarveda sa Barili Police Station sa dihang nahinabi sa Banat News nga ang magtiayon nag-withdraw og kuwarta alang sa ilang negosyo nga pagpamalit og mga kopras.

Sa dihang naabot sa pinuy-anan, nanaog sa kotse si Gina aron ablihan ang gate sa balay, apan kalit lang mitunga ang duha ka lalaking nagtaptap sa nawong dayong deklarar og tulis.

Gituohang misukol ang magtiayon ug nagmagahi pagtugyan sa bag niini nga gisudlan sa kuwarta ug maoy gituohang hinungdan nga gipamusil.

Si Gina patay diha-diha human makaangkon og samad pinusilan sa dughan ug tiyan samtang kritikal ang kahimtang sa kanhi bise mayor human makaangkon og duha ka samad pinusilan sa tiyan, paa ug kamot ug gidala dayon sa South General Hospital sa Naga apan gibalhin sa Cebu Doctor’s Hospital dinhi sa dakbayan tungod sa lisod nga kahimtang.

Si Luisito Ponseca maoy kanhi bise mayor sa Barili ubos sa pagdumala ni kanhi Mayor Bobby Alquizola.

Samtang ang duha ka tulisan daling nakasibat sakay sa Honda Waive nga motorsiklo ug Honda XRM nga nag-parking sa gawas nga bahin diin mag-posting ang duha ka kauban nilang nagsilbing ‘lookout’ ug mipasirit paingon sa lungsod sa Aloguinsan.

Ang kapolisan nakadiskubre og duha ka kabhang sa bala sa kalibre .45 sa crime scene ug padayon karon ang manhunt operation batok sa mga tulisan.

Si Cebu Provincial Police Office director Jesus Gaquing mimando sa hepe sa Barili pagresolbar sa maong kaso.

Nagtuo hinuon si Gaquing nga ‘local boys’ ang mibiktima sa magtiayong Ponseca. – BANAT NEWS