CEBU, Philippines - Usa ka konduktor sa sakyanang pasaheroan kinsa miuwang sa nagdinunggabay niyang pasahero maoy nalubaan didto sa sitio Fatima, Highway Tagunol, barangay Basak San Nicolas, ning dakbayan sa Sugbo sa miaging gabii.
Ang biktima mao si Ernesto Abanilla, 22, konduktor sa PUJ nga 11A nga nagbiyahian sa Inayawan-Colon, samtang ang nakadunggab kaniya wala hiilhi.
Ang biktima mibutyag sa kapolisan nga samtang nagpaingon sila sa Inayawan gikan sa Colon, misakay ang usa ka wala hiilhing lalake didto sa Tagunol ug dihang nakita niya ang iyang kontra didto sa sulod sa sakyanan naglalis dayon ang duha.
Dihang miinit na ang linalisay nakadesider ang biktima nga mouwang niini apan gikalitan og duslak sa kutsilyo ang iyang kilid ug dayong ambak sa kriminal gikan sa sakyanan ug mikabad kini og dagan pahilayo sa maong lugar.
Gidali paghatod ang biktima ngadto sa Cebu City Medical Center samtang gipangita pa sa kapolisan ang mamumuno. - Lesley Caminade (BANAT NEWS)