CEBU, Philippines - Patay nang nakit-an ang usa ka mag-uuma sa sitio Bung-aw barangay Malalay sa lungsod sa Ronda human mababha ang bukobuko niini nga gipusil og shotgun sa wala pa mailhing tawo niadtong Miyerkules sa alas 10:00 sa gabii. Ang biktima nailhan nga si Isidro Pesalbon, 29, nagpuyo ra sa nahisgutang lugar samtang ang mamumuno pabilin pang gitumbok sa kapolisan.
Matud pa ni PO2 Socrates Avila sa Ronda Police dihang nahinabi sa Banat News usa ka kagawad sa barangay nga si Romeo Sosas maoy mipahibawo sa kapulisan sa maong panghitabo.
Subay sa inisyal nga imbestigasyon ang biktima gikan sa iyang pinuy-anan naglakaw paingon sa barangay Mangga sa lungsod sa Alcantara aron mobilar sa namatay nga paryente apan pag-abot sa utlanan sa barangay Malalay ug barangay Mangga gipusil kini sa wala mailhing tawo.
Ang biktima nakaangkon og tulo ka mga samad sa bukobuko gikan sa gituohang shotgun.Ang kapulisan padayun pa sa ilang imbestigasyon pagtumbok sa suspek Ug sa motibo sa maong krimen. – BANAT NEWS