CEBU, Philippines - Ang pangulo sa kapulisan sa lalawigan sa Sugbu Sr. Supt. Jesus Gaquing, gibalibaran ni Consolacion Mayor Avelino Gungob sa hangyo niya nga ipabilin ang mga police nga nag-opisina diha sa munisipyo sa lungsod.
Kini maoy gibutyag ni Sr. Supt. Gaquing human gikataho nga si Mayor Gungob, mibahad nga ihinayon niya ang pagpalayas sa mga kapolisan sa lungsod sa liwas sa kalag-kalag ug piyesta sa lungsod.
Si Sr. Supt. Gaquing mibutyag nga niadto rang Lunes siya balibari ni Gungob dihang mibisita siya sa opisina niini .
Matud pa niya nga mibahad gyud si Gungob nga barugan niya ang iyang gisaad nga gawas lang kun ipabalik ang iyang duha ka mga police escort nga sila si PO3 Sherwin Leyson ug PO3 Joramie Espinosa dili niya iatras ang iyang laraw sa pagpalayas sa mga kapolisan gikan sa lungsod.
Matud pa ni Gaquing nga personal gyud siya nga miadto sa buhatan sa mayor aron ipadangat ang iyang hangyo.
Gipasabot niya nga ilang gi-estoryahan ang mga butang nga may labot sa pagmintenar sa kahusay ug kalinaw sa lungsod sa higayong wala nay polis nga madestino niini.
Apan ang mayor nagpabilin sa iyang hugot nga baruganan nga palayason ang mga police sa munisipyo, busa si Gaquing mipadayag usab sa iyang kaisog nga bisag unsay mahitabo dili ug dili gayud niya ibalik ang mga police escort sa mayor.
Matud pa ni Gaquing nga andam ra ang kapolisan nga magsuga lang og kandila ilawom sa punoan sa mangga kay sagrado ang ilang katungdanan sa pagbantay sa katawhan ug dili lamang sa mayor sa lungsod. - BANAT NEWS