CEBU, Philippines - Hugtanong gidepensaan ni Esteban del Mar, chairman sa Technology Resource and Information Network (TRAIN) ang kontrobersiyal nga Naga coal plant nga plano karong ipasira sa mga environmental activist dinhi sa Sugbu.
Sa iyang suwat ngadto ni Naga City Mayor Val Chiong, si Del Mar nagkanayon nga daghan siya og nakitang buslot sa mga gipagawas nga data ug impormasyon sa mga environmentalist mahitungod sa kadaot nga ihatag sa coal-fired power plant diha sa lungsod sa Naga.
Matud pa ni Del Mar nga dili tinuod ang pasangil sa mga environmentalist nga ang coal plant mao ang hinungdan sa pagkausab sa lasa sa tubig diha sa Naga.
Sa resulta sa eksaminasyon sa mga environmentalist, ang tubig gikan sa mga tabay sa Naga adunay taas nga content sa cadmium, lead ug mercury nga pulos delikado nga matang sa kemikal, apan si Del Mar mi-asuy nga sa migawas sa iyang pagtuon, wala siya’y nakitang risgo alang sa mga residente sa Naga nga moinom sa ilang tubig.
Gitudlo nga rason ni Del Mar sa lahi nga lasa sa tubig sa maong lugar mao ang taas nga level sa total dissolved solids (TDS) nga resulta sa grabeng pagkaupaw sa mga kakahoyan diha sa Naga.
Gisalikway usab ni Del Mar ang pangangkon sa mga environmentalist nga magmugna og dakung kadaut sa kalikupan ug sa panglawas sa katawhan diha sa Naga ang duha ka 200-megawatt coal-fired plants nga gitukod sa Kepco SPC Power Corp.
Si Del Mar nagkanayon nga imposible nga mao kini ang itudlo isip rasun sa mga nikatap nga sakit diha sa Naga tungod kay dili kini ang unang power-plant nga gitukod sa maong lugar.
Ang duha ka 100 MW coal thermal plants nga gitukod diha sa Naga power complex sa National Power Corp. (Napocor), mao ang gihimong ehemplo ni Del Mar nga ebidensiya nga dugay na ang power-plant diha sa Naga.
Gikwestiyon ni Del Mar nga kung makadaot pa ang coal plant, nganung negative ang nigawas sa inquiry sa Naga City Health sa pasangil sa kadaut sa maong planta sa mga residente nga nagpuyo duol niini.
Dugang pa ni Del Mar nga dili kinahanglan babagan ang pagtukod sa mga coal powerplant tungod kay magsilbe kini nga dakung tabang sa tibuok Sugbu kung ugaling makahiagum kita og laing power crisis sama sa atong gidangatan niadtong dekada 90. – BANAT NEWS